Նախկին պաշտոնյաների ու օլիգարխների հարկային բեռը «թեթևացե՞լ» է

ՊԵԿ պաշտոնական կայքում հրապարակվել է 2023 թ. հունվար-հունիս ամիսների ընթացքում առաջին 1000 խոշոր հարկ վճարողների կողմից վճարված հարկերի և վճարների վերաբերյալ տեղեկատվությունը: 1000 խոշոր հարկ վճարողների կողմից 2023 թ. հունվար-հունիս ամիսների ընթացքում պետական բյուջե ընդհանուր առմամբ վճարվել է ավելի քան 874 միլիարդ 522 միլիոն դրամ: Հարկային մարմին կատարված վճարումների գումարը կազմել է ավելի քան  668 միլիարդ 245 միլիոն դրամ, իսկ մաքսային մարմին կատարված վճարումների գումարը՝ շուրջ 206 միլիարդ 277 միլիոն դրամ։

Խոշոր հարկ վճարողների ցանկը գլխավորում է Զանգեզուրի պղնձամոլիբդենային կոմբինատը։ Հաջորդաբար առաջին տասնյակում են նաև «Գազպրոմ Արմենիա»-ն, «Գրանդ Տոբակո»-ն, «Ամերիաբանկ»-ը, «Արդշինբանկ»-ը, «Մոբայլ Սենթր Արթ»-ը, «Փրիթի Ուեյ»-ը, «Սի Փի Էս Էներջի Գրուպ»-ը, «Ինտերնեյշնլ Մասիս Տաբակ»-ը, «Ջեյ Թի Այ Արմենիա»-ն։

Սամվել Ալեքսանյանի «Սիթի»–ն 15-րդն է՝ 7,394,161 դրամ վճարած հարկերով:  Բարսեղ Բեգլարյանի ընտանիքի հետ փոխկապացվող «Ֆլեշ»-ը՝ 17-րդը, 7,203,397 դրամ վճարած հարկերով:  Նույն Սամվել Ալեքսանյանին պատկանող «Ալեքս Ընդ Հոլդինգ»-ը 20-րդ հորիզոնականում է 5,689,561 դրամ վճարած հարկերով: «Մաքս Օիլ»-ը, որը պատկանում է նախկին պատգամավոր Հարություն Փամբուկյանին, 22-րդն է 5,441,487 դրամ վճարած հարկերով: Սամվել Ալեքսանյանի «Նատալի ֆարմ»-ը 48-րդն է՝ 3,147,346 դրամ վճարած հարկերով: Աշոտ Արսենյանին պատկանող «Ջերմուկ Գրուպ»-ը 78-րդ հորիզոնականում է՝ 2,011,164 դրամ վճարած հարկերով: Բալասանյանների ընտանիքին պատկանող «Գյումրի-Գարեջուր»–ը 191-րդն է՝ 833,678 դրամ վճարած հարկերով:

2022 թվականի երկրորդ կիսամյակում պատկերը հետևյալն էր՝ «Ֆլեշ»-ը  8-րդ հորիզոնականում էր՝ 7,601,908 դրամ վճարած հարկերով,  «Ալեքս Ընդ Հոլդինգ»-ը 11-րդը՝ 6,667,125 դրամ վճարած հարկերով:  «Մաքս Օիլ»-ը 16-րդն էր՝ 5,188,675 դրամ վճարած հարկերով: «Նատալի ֆարմ»-ը 43-րդն էր՝ 2,608,049 դրամ վճարած հարկերով: «Գյումրի-Գարեջուր»–ը զբաղեցնում էր 180-րդ հորիզոնականը՝ 653,159 դրամ վճարած հարկերով:

Կարող ենք փաստել, որ նախորդ տարվա նույն ժամանակահատվածի համեմատ նախկին պաշտոնյաների և օլիգարխների ընկերությունները զգալիորեն զիջել են դիրքերը և էլ ավելի քիչ գումար են վճարում պետական բյուջե: