Թուրքիան նախազգուշացրել է Ռուսաստանին չմիջամտել և խուսափել լարվածությունը սրելու փորձերից

Թուրքիան Ռուսաստանի հետ քննարկել է չոր բեռն եր տեղափոխող Şükrü Okan նավի հետ կապված միջադեպը, որը կալանվել էր ռուս զինվորականների կողմից հանգստյան օրերին, և զգուշացրել է Սև ծովում նավերի շարժը չխոչընդոտելու մասին։ Ինչպես գրում է European Pravda-ն, այս մասին ասված է Թուրքիայի նախագահի հաղորդակցության վարչությանը կից Ապատեղեկատվության հակազդման կենտրոնի (DMM) հաղորդագրության մեջ։

DMM զեկույցը վերաբերում է ենթադրյալ «թուրքական նավի վրա ռուս զինվորականների կողմից հարձակման» մասին հաղորդագրությունների հերքմանը։ Նրանք բացատրել են, որ Şükrü Okan-ի հետ միջադեպը տեղի է ունեցել միջազգային ջրերում, և նավը թեև պատկանում է թուրքական ընկերությանը, նավարկում է Պանամայի դրոշի տակ։

«Չնայած այս ամենին՝ նավի տեղաշարժին միջամտելուց հետո Ռուսաստանի Դաշնությունում զրուցակիցները պատշաճ կերպով զգուշացվել են խուսափել Սև ծովում լարվածությունը սրելու նման փորձերից», - հավելել է թուրքական վարչակազմը։

Նավը, որն ուղևորվում էր դեպի Իզմայիլ նավահանգիստ, չի արձագանքել ռուսների՝ ստուգման համար կանգ առնելու պահանջներին։ Դրանից հետո ռուսները մոտեցել են նավին ու ստուգում իրականացրել և հետո միայն բաց թողել այն։