Հաքերները կոտրել են աշխարհահռչակ վերլուծական ընկերության սերվերը

«Utro.ru» կայքը հայտում է. «Anonymous» հաքերներն կոտրել են աշխարհահռչակ «Stratfor» վերլուծական ընկերության կայքը: Աշխարհում տեղի ունեցող իրադարձութունների մասին տեղեկությունների հավաքագրմամբ եւ հետազոտությամբ զբաղվող ընկերության ծառայությունից օգտվում են ԱՄՆ բանակը, ներդրումային  «Goldman Sachs» ընկերությունը: «Stratfor»-ը նաեւ անվանում են «ստվերային ԿՀՎ»:

Հաքերները «Stratfor»-ի սերվերը ջարդելու մասին հայտարարել են Twitter-ի իրենց միկրոբլոգում` նշելով, թե հաջողվել է գողանալ մոտ 200 գիգաբայթ տեղեկատվություն,  այդ թվում` աշխատակիցների գրագրություններն իրենց սպառողների հետ, անձնական տվյալներ, նաեւ բանկային քարտերի համարներ: «Anonymous»-ը հայտարարել է, որ դրանում մեղավոր են  «Stratfor»-ի  ծրագրավորողները,  ովքեր նեղություն չեն կրել ծածկագրել անձնական տվյալները:

«LulzXmas-ը միայն սկսվում է: Մնացեք մեզ հետ, զվարճությունը երաշխավորված է, հակառակ դեպքում մենք ձեզ կվերադարձնենք ձեր փողերը»,- խոստացել են հաքերները:

Նշենք, որ հաքերական այս խմբավորումը հայտնի է դարձել անցած տարվա վերջին, երբ այն սկսեց հարձակումներ գործել «Վիքիլիքսի» գործունեությունը խոչնդոտող ընկերությունների վրա։ Ավելի ուշ նրանք միավորվեցին մեկ ուրիշ խմբավորման՝ LulzSec–ին, որը «հաճույքի համար» կոտրում էր ԱՄՆ–ի կառավարական կայքերը։