Ռուսաստանը ԱԹՍ-ներով հարվածել է Օդեսային. վնասվել են հացահատիկի ամբարները

Օգոստոսի 23-ի գիշերը ռուս զինվորականները երեք ժամ շարունակ անօդաչու սարքերով հարվածներ են հասցրել Օդեսայի շրջանին։ Տարածաշրջանային ռազմական վարչակազմի ղեկավար Օլեգ Կիպերի խոսքով՝ հարձակման թիրախը եղել են քաղաքացիական ենթակառուցվածքային օբյեկտները, գրում են միջազգային ԶԼՄ-ները։

Պայթյունների մասին հաղորդագրություններ են ստացվել Իզմայիլից, Դանուբի ուկրաինական նավահանգստից և շրջակայքից:

Ուկրաինայի Զինված ուժերի հարավային հրամանատարության տվյալներով՝ հակաօդային պաշտպանության ուժերի կողմից ոչնչացվել է «Շահեդ կամիկաձե» ինը անօդաչու թռչող սարք։ Մնացած անօդաչու սարքերը (դրանց թիվը չի նշվում) վնասել են Դանուբի տարածաշրջանի ամբարները և արտադրական ու փոխադրման համալիրը։ Հրդեհ է բռնկվել։ Խաղաղ բնակչության շրջանում զոհեր չկան։