Հաջորդ տարի ևս կգործի՞ առանց մաքսատուրքի էլեկտրամոբիլների ներմուծումը

2023 թվականի 8 ամսվա ընթացքում (հունվար-օգոստոս) Հայաստան է ներմուծվել 3456 հատ, այդ թվում՝ 0 տոկոս ներմուծման մաքսատուրքի դրույքաչափով 2811 էլեկտրական շարժիչով ավտոմեքենա: Այս մասին ԼՈւՐԵՐ.com-ի հարցմանն ի պատասխան տեղեկացնում են Պետական եկամուտների կոմիտեից՝ միաժամանակ նշելով, որ մնացորդը կազմել է 4589 հատ ավտոմեքենա՝ մինչև այս տարվա դեկտեմբերի 31-ը առանց մաքսատուրքի ներկրվող  7400 հատից:

Այդ էլեկտրամոբիլների համար ներմուծման մաքսատուրք չի գանձվել: Սակայն, նկատենք, որ հաշվարկը լինելու է ֆիզիկական, այսինքն՝ 7400 մեքենայի քվոտան լրանալուն պես, 7401-ն արդեն պետք է մաքսատուրք վճարի:

Մեր այն հարցին, թե պահանջարկով պայմանավորված հնարավո՞ր է լինեն քանակի ավելացման փոփոխություններ, ինչպես նաև հաջորդ տարի ևս լինի առանց մաքսատուրքերի ներմուծելու հնարավորություն՝ ՊեԿ-ից հայտնում են, որ այդ մասին դեռևս տեղեկատվություն չունեն:

ՊԵԿ-ից ընդգծում են նաև, որ այս արտոնության կիրառմամբ ՀՀ ներմուծված տրանսպորտային միջոցները չեն կարող տրամադրվել ՌԴ քաղաքացիներին և (կամ) ՌԴ մշտական բնակություն ունեցող անձանց տիրապետման, տնօրինման, օգտագործման նպատակով:

Նշենք, որ շրջակա միջավայրի աղտոտումը նվազեցնելու, ինչպես նաև էլեկտրամոբիլների ներկրումը խթանելու նպատակով կառավարությունը որոշել էր սակագնային արտոնություն կիրառել, ըստ որի՝ 2023-ի ընթացքում ԵԱՏՄ ԱՏԳ Աև 8703 80 000 2 ծածկագրին դասվող էլեկտրաշարժիչով շարժիչային տրանսպորտային միջոցների ՀՀ ներմուծումը թույլատրվում է 0 տոկոս ներմուծման մաքսատուրքի դրույքաչափի կիրառման պայմանով՝ 7400 հատից ոչ ավելի ծավալով։

Սոնա Հարությունյան