Ադրբեջանի 2 և Թուրքիայի 10 քաղաքացիներ դիմել են Հայաստանում ապաստան ստանալու հայցով

Ադրբեջանի 2 և Թուրքիայի 10 քաղաքացիներ դիմել են Հայաստանում ապաստան ստանալու հայցով։ Ադրբեջանի քաղաքացիներից մեկի դիմումը կարճվել է, երկրորդինը նշված չէ։ Թուրքիայի 10 քաղաքացիներից երկուսի դիմումը կարճվել է, մեկը` մերժվել, մյուս դիմումների ընթացքի մասին չի նշվում։ Այս մասին հայտնում է ՆԳՆ Միգրացիայի և քաղաքացիության ծառայությունը։

Ըստ ծառայության՝ 2023 թ. առաջին կիսամյակում, ընդհանուր առմամբ, 440 մարդ դիմել է Հայաստանի Հանրապետությունում ապաստան հայցելու համար, որից 156-ի դիմումը կարճվել է, 55-ինը` մերժվել, իսկ փախստականի կարգավիճակ է ստացել 179 մարդ։ 2023 թ. առաջին կիսամյակում Հայաստանից ամենից շատ Իրաքի քաղաքացիներն են ապաստան հայցել` 131 մարդ, երկրորդ տեղում Ուկրաինայի քաղաքացիներն են՝ 115 մարդ, 3-րդ տեղում Իրանը՝ 40 մարդ։

Ռուսաստանը ցանկում 6-րդ տեղում է. ընդամենը 18 մարդ է դիմել ՀՀ-ին ապաստան ստանալու համար։