Արևմուտքը և նրանց ազդեցության գործակալները փորձում են վարկաբեկել Ռուսաստանի ներկայությունը տարածաշրջանում․ ՌԴ ԱԽ

Հայ-ադրբեջանական հակամարտության գոտի ՀԱՊԿ դիտորդական առաքելություն ուղարկելու Ռուսաստանի առաջարկը չի իրականացվել, սակայն ուժի մեջ է։ Այս մասին «Ռոսիյսկայա գազետա» կառավարական հրատարակությանը տված հարցազրույցում ասել է ՌԴ Անվտանգության խորհրդի քարտուղարի տեղակալ Ալեքսեյ Շևցովը։

«Ռուսաստանի նախաձեռնությամբ առաջարկվել էր ՀԱՊԿ դիտորդական առաքելություն ուղարկել հակամարտության գոտի, ցավոք, հայ-ադրբեջանական սահմանին այն տեղակայելու որոշումը չիրականացվեց, սակայն առաջարկը մնում է ուժի մեջ»,- ասել է Շևցովը։

Նրա խոսքով՝ այժմ Ռուսաստանի Դաշնությունը ջանքեր է գործադրում 2020 թվականի նոյեմբերին ձեռք բերված եռակողմ պայմանավորվածությունների իրականացման համար։ Նրա խոսքով՝ շփման գոտում ռուս խաղաղապահներն առաջադրանքներ են կատարում՝ կանխելու էսկալացիան։

Երկրի ղեկավարությունն օգնում է աշխատել խաղաղության պայմանագրի վրա, ապաշրջափակել տրանսպորտային միջանցքները, վերականգնել տնտեսական կապերը և սահմանազատել հայ-ադրբեջանական սահմանը, ինչպես նաև ընդհանուր առմամբ ամրապնդել վստահությունը հակամարտող կողմերի միջև, ասել է Շևցովը։

«Մենք արձանագրում ենք ԱՄՆ-ի, ԵՄ-ի, արևմտյան առանձին երկրների և նրանց ազդեցության գործակալների համառ փորձերը՝ միջամտելու ԼՂ կարգավորման գործընթացին, վարկաբեկելու Ռուսաստանի ներկայությունը տարածաշրջանում և ամրապնդելու իրենց դիրքերը»,- ընդգծել է ՌԴ Անվտանգության խորհրդի քարտուղարի տեղակալը։