Արայիկ Հարությունյանը հրաժարական կտա՞

Այսօր մամուլում լուրեր  տարածվեցին, որ ԱՀ նախագահ Արայիկ Հարությունյանը այսօրվա ընթացքում հրաժարական կտա։ 

ԼՈՒՐԵՐ.com-ի հետ զրույցում, նախագահի խորհրդական Վլադիմիր Գրիգորյանը ո՛չ հերքեց, ո՛չ հաստատեց լուրը։ 

«Այս պահին չեմ կարող այդ տեղեկությունը մեկնաբանել, սպասենք համապատասխան  հայտարարություն կլինի»,- ասաց  Հարությունյանի խորհրդական Վլադիմիր Գրիգորյանը։ 

Արցախի Ազգային ժողովի պատգամավոր Մետաքսե Հակոբյանը ԼՈՒՐԵՐ.com-ի հետ զրույցում նշեց, որ պաշտոնապես նման բան չկա, սակայն իրեն ևս հասել են նման տեղեկություններ. «Մենք էլ ենք լսել այդ լուրը, բայց որևէ բան չկա այս պահի դրությամբ։ Չեմ կարող կանխատեսել, ո՛չ բացառել, ո՛չ հաստատել դա»,- ասաց Մետաքսե Հակոբյանը:

Հիշեցնենք, որ տելեգրամյան ալիքները, այդ թվում Բաղրամյան 26-ը, տեղեկություն էին հայտնել, որի համաձայն Արայիկ Հարությունյանն այսօր հրաժարական կտա։ Ըստ տեղեկությունների՝ Արայիկ Հարույունյանը հրաժարական տալուց առաջ աշխատանքից կազատի Արցախի պետնախարար Գուրգեն Ներսիսյանին։  

Ըստ այդմ, երկրի ղեկավարումը կանցնի Անվտանգության խորհրդի քարտուղար Սամվել Շահրամանյանին։ Ըստ ամենայնի՝ նա էլ կլինի նախագահի պաշտոնի թեկնածուն, որին պետք է ընտրի Ազգային ժողովը։