Ոսկյա զարդեր, գույք, ռոյալ. ի՞նչ թանկարժեք իրեր են հայտարարագրել ՔՊ-ական պաշտոնյաները
Վերլուծական
Ընդդիմադիր Նիկոլ Փաշինյանը հաճախ էր մեղադրում Հանրապետական կուսակցության անդամներին, որ իր խոսքերով` աղքատ երկրում վերջիններիս հայտարարագրերում առկա թանկարժեք իրերն աչք են ծակում` տպավորություն ստեղծելով, որ Լուվրում ենք։
Իսկ որքանո՞վ են վերը նշված Լուվրից հեռու իր հեղափոխական թիմի անդամները, ՔՊ-ական պաշտոնյաները։
Դիցուք` ՔՊ ցուցակով պատգամավոր դարձած Գուրգեն Արսենյանը հայտարարագրել է նաև 4 միլիոն դրամը գերազանցող բազմաթիվ իրեր։ Նրա հայտարարագրում տեսնում ենք «Բրեգետ» և «Աուդեմար Պիգե» ընկերությունների երկու ժամացույցներ, համապատասխանաբար՝ 51 միլիոն 300 հազար և 82 միլիոն դրամ արժողությամբ, 1 կգ ոսկյա ձուլակտոր, որի արժեքը 32 միլիոն 55 հազար դրամ է, 2 հատ ոսկյա հուշադրամների հավաքածու՝ 18 միլիոն դրամ, 19 հատ նկարների հավաքածու, որոնց ընդհանուր արժեքը 532 միլիոն 900 հազար դրամ է, 300 հազար դոլար արժողությամբ ճաշասենյակի կահույք, հյուրասենյակի կահույք` 18 միլիոն դրամ արժողությամբ, խոհանոցի կահույք` 110 միլիոն արժողությամբ և ննջասենյակի կահույք` 62 միլիոն արժողությամբ։
Թանկանոց «Ռոլեքս» ժամացույց է հայտարարագրել իմքայլական պատգամավոր Ռուստամ Բաքոյանը, ով մինչ այդ աչքի չէր ընկնում իր ունեցվածքով։
2019-ին ներկայացրած տարեկան հայտարարագրում այն ժամանակ դեռևս ՊՎԾ պետի տեղակալ Արգիշտի Քյարամյանը հայտարարագրել էր 8 միլիոն դրամը գերազանցող թանկարժեք իրեր և զարդեր` առանց մանրամասներ ներկայացնելու։
Սփյուռքի գործերի գլխավոր հանձնակատար Զարեհ Սինանյանը հայտարարագրում նշել էր 15 հազար ԱՄՆ դոլարով ձեռք բերված ռոյալի առկայության մասին։
Ռոմանոս Պետրոսյանը «Միկշին» ընկերությունից ձեռք է բերել բնակարան՝ Արաբկիր վարչական շրջանում, 51 մլն 357 հազար դրամ արժեքով կամ շուրջ 106 հազար դոլարով, ինչը համարվում է թանկարժեք գույք։
Մալաթիա-Սեբաստիա վարչական շրջանի արդեն նախկին ղեկավար Դավիթ Կարապետյանը հայտարարագրել է 8 մլն դրամը գերազանցող թանկարժեք զարդեր, հնաոճ իրեր, իսկ դրամական միջոցը կազմում է 14.5 մլն դրամ:
Մեծամորի համայնքապետ Վահրամ Խաչատրյանը հայտարարագրել է ոսկյա զարդեր` 20 միլիոն դրամ արժողությամբ և 33 հազար դոլար արժողությամբ «Ռոլեքս» ժամացույց:
Դավթաշեն վարչական շրջանի ղեկավար Ռոման Համբարձումյանը հայտարարագրել է 16,000.00 դոլար արժողությամբ ձեռքի ժամացույց:
Արդարադատության նախարար Գրիգոր Մինասյանը 4 միլիոն դրամից ավելի արժեք ունեցող 5 գույք է հայտարարագրել, որոնք բոլորը նվիրատվություն է ստացել 2009 թվականին․
- Ձեռքի ժամացույց – արժեքը՝ 22,000 դոլար,
- Ձեռքի ժամացույց – արժեքը՝ 16,000 դոլար,
- Արվեստի գործ – արժեքը՝ 12,000 դոլար,
- Արվեստի գործ – արժեքը՝ 15,000 դոլար,
- Արվեստի գործ – արժեքը՝ 15,000,000 դրամ։
ՔՊ-ական պատգամավոր Էդգար Հակոբյանը երկու մեքենա ունի` Mercedes և Toyota մակնիշի ավտոմեքենաներ՝ համապատասխանաբար 2003 և 2013 թվականների արտադրության, 2006 թվականին 4.5 մլն դոլարի թանկարժեք զարդեր է ձեռք բերել, որի աղբյուրը հրապարակված չէ։
ՈՒՂԻՂ ԵԹԵՐ
Ամենադիտված 
Էլիզ Մելիքյանը մայրիկի հետ լուսանկար է հրապարակել
