ԱՄՆ-ն պատրաստվում է Կիևին սպառված ուրանով արկեր մատակարարել

Վաշինգտոնը նախատեսում է առաջին անգամ Կիևին տրամադրվող օգնության ևս մեկ փաթեթում ներառել ուրանի սպառված պարկուճները, հայտնում է Reuters-ը։

Գործակալության տվյալներով՝ հաջորդ շաբաթ կարող է հայտարարվել Ուկրաինային օգնության նոր փաթեթի մասին։ Դրանում կարող են ներառվել սպառված ուրանով զրահաթափանց արկեր։

Նշվում է, որ արկերը նախատեսված են լինելու ամերիկյան Abrams տանկերի համար, որոնք Ուկրաինայի զինված ուժերը կստանան առաջիկա շաբաթվա ընթացքում։ Ուկրաինական զորքերը կկարողանան դրանք օգտագործել ռուսական տանկերի դեմ։

Ուկրաինային օգնության նոր փաթեթը կներառի 240-375 միլիոն դոլարի զենք:

Մինչ այս ԱՄՆ նախագահի թեկնածու Ռոբերտ Քենեդի կրտսերը հայտարարել էր, որ ԱՄՆ-ն նպաստում է Ուկրաինայի կործանմանը` Ուկրաինայի զինված ուժեր ուղարկելով սպառված ուրանի արկեր։

Քենեդին խոստացել է, որ երբ նախագահ դառնա, «վերջ կտա ամերիկյան ներկայիս ղեկավարության այս անխոհեմ ու անմարդկային քաղաքականությանը»։