Աֆղանստանի արևմուտքում թալիբները փակել են արվեստի դպրոցը՝ այնտեղ աղջիկների հաճախելու պատճառով

Աֆղանստանում իշխանությունը զավթած արմատական ​​«Թալիբան» շարժման կողմնակիցները փակել են արվեստի դպրոցը Հերաթ նահանգում՝ աղջիկների` այնտեղ դասերի հաճախելու պատճառով։ Այս մասին հայտնում է Hasht-e Subh թերթը։

Նրանց խոսքով՝ այն բանից հետո, երբ թալիբներն իմացել են, որ երիտասարդ աֆղան կանայք հաճախում են գեղագրության դասընթացների` չնայած կանանց համար լրացուցիչ կրթության արգելքին, դպրոցը փակվել է։ Հրատարակությունը նշում է, որ իսլամական արվեստի ուսուցման կենտրոնը Հերաթում գործում էր արդեն 40 տարի և համարվում էր իր տեսակի մեջ ամենամեծ ուսումնական հաստատությունն ամբողջ Աֆղանստանում։

Պարբերականը նաև հայտնել է, որ վերջին մի քանի օրերին թալիբների կողմնակիցները փակել են ևս երկու ուսումնական կենտրոն և մեկ մասնավոր դպրոց՝ աղջիկների հաճախելու պատճառով։ Հունիսի 21-ին հայտնի դարձավ, որ թալիբներն արգելել են աղջիկների ընդունելությունը երկրի կենտրոնում գտնվող Ղազնի նահանգի ուսումնական հաստատություններում։ Այս նոր կանոնը չկատարելու դեպքում ուսումնական հաստատությունների ղեկավարությանը պատիժ է սպառնում։

2021 թվականին իշխանության գալուց ի վեր՝ թալիբները դադարեցրել են աղջիկների դասերը միջնակարգ դպրոցներում և աղջիկների համար համալսարաններում, արգելել են կանանց ներկայությունը համալսարաններում, այդ թվում՝ պրոֆեսորադասախոսական կազմի անդամներին, և կարգադրել կանանց հեռացնել աշխատանքից բոլոր ազգային և միջազգային ոչ կառավարական կազմակերպություններից։ Այս որոշումները քննադատության ալիք են առաջացրել մի շարք օտարերկրյա պետությունների ու միջազգային կազմակերպությունների, այդ թվում՝ ՄԱԿ-ի կողմից։