Ֆրանսերենը՝ որպես երրորդ օտար լեզու Արցախի դպրոցական ծրագրից չի հանվել. պարզաբանում

Շրջանառվող լուրերն այն մասին, թե իբր ֆրանսերենը՝ որպես երրորդ օտար լեզու դպրոցական ծրագրից հանվել է, չի համապատասխանում իրականությանը։

Այդ մասին՝ ի պատասխան «Արցախպրես»-ի հարցմանը նշված է ԱՀ ԿԳՄՍ նախարարության մամուլի ծառայության պարզաբանման մեջ:

«Ուսումնական հաստատություններում երրորդ օտար լեզվի դասավանդումն իրականացվում է համապատասխան ուսումնական տարվա պլանի, մասնավորապես՝ «Օտար լեզվի ընտրության կարգ»-ի։ Երրորդ օտար լեզվի դասավանդման ընտրությունը վերապահված է ուսումնական հաստատությանը՝ մանկավարժական ու ծնողական խորհուրդների որոշմամբ։ Ուսումնական հաստատությունը կարող է նաև հրաժարվել երրորդ օտար լեզվի դասավանդումից՝ հիմնավոր պատճառաբանությամբ (մասնագետի, ուսումնամեթոդական, նյութատեխնիկական բազայի բացակայություն և այլն)»,- ասված է պաշտոնական պարզաբանման մեջ։