Թուրքիայում Ֆրանսիայի նոր դեսպանին երկրի թշնամի են անվանել

Թուրքական մի շարք լրատվամիջոցներ անդրադարձել են Թուրքիայում Ֆրանսիայի նորանշանակ դեսպան Իզաբել Դյումոնտին, ով այս շաբաթ իր հավատարմագրերն է հանձնելու Թուրքիայի նախագահ Ռեջեփ Թայիփ Էրդողանին ու ստանձնելու իր պարտականությունները, գրում է Ermenihaber-ը: 

Հրապարակման մեջ նշվում է, որ նախկինում Դյումոնտը եղել է Եվրոպայի ու Թուրքիայի հետ հարաբերությունների հարցում Ֆրանսիայի նախագահի խորհրդականը: Հրաշալի տիրապետում է թուրքերենին։

Նշվում է, որ Դյումոնտը բազմիցս քննադատել է  քուրդ զինյալների դեմ Թուրքիայի ռազմական գործողությունները Սիրիայում, որոնց Անկարան համարում է ահաբեկիչներ: 

Մասնավորապես, նշվում է, որ մինչ Թուրքիան Լեռնային Ղարաբաղի շուրջ հայ-ադրբեջանական վերջին լարվածությունում լիովին անցել է Բաքվի կողմը, Ֆրանսիան և Եվրամիությունն Ադրբեջանին կոչ են անում հեռու մնալ այնպիսի քայլերից, որոնք կարող են տարածաշրջանում հումանիտար խնդիրներ ստեղծել:

Ըստ թուրքական ԶԼՄ-ների` Ֆրանսիան ցանկանում է, որ Թուրքիան օգտագործի իր ազդեցությունն Ադրբեջանի վրա՝ Բաքվի և Երևանի միջև «‎համապարփակ խաղաղության» պայմանագրի հասնելու համար։ 

Ընդհանուր առմամբ, թուրքական մամուլը նրան ներկայացնում է՝ որպես Թուրքիայի թշնամի։