ՔՊ-ական պաշտոնյաների անպատիժ մնացած լկտի պահվածքը

Հայաստանում տեղի ունեցած հեղափոխության օրերին ապագա պաշտոնավորողները հայտարարում և խոստանում էին, որ իրենք Հայաստան նոր մշակույթ են բերելու: Թե որքանով դա իրականություն դարձավ, կարելի է դատել ՔՊ-ական մանր, միջին և նույնիսկ բարձրաստիճան պաշտոնյաների հրապարակավ դրսևորվող լկտի պահվածքից:

Դիցուք՝ ՔՊ-ական  պատգամավոր Քրիստինե Պողոսյանը ԱԺ-ում պատրաստվում էր հարվածել իր աշխատանքային պարտականությունները կատարող լրագրողին՝ նման վարքագիծը համեմելով սպառնալիքներով։

Պատգամավոր Արմեն Խաչատրյանը լրագրողների հետ շփվում է պատագամավորին ոչ վայել բառապաշարով։

Պատգամավոր Վահագն Ալեքսանայնը լրագրողներին անվանել է վերբալ մարմնավաճառներ, մինչդեռ այս խոսույթը նույնպես, մեղմ ասած, չի տեղավորվում պատգամավորի էթիկայի կանոնների մեջ։

ՊՊԾ պետ Սարգիս Հովհաննիսյանը ոտքով հարվածում է լրագրողին և դեռ երկար ժամանակ շարունակում պաշտոնավարել։

Նույնը կարելի է ասել նաև Հովիկ Աղազարյանի մասին։

Նմանատիպ պահվածքով աչքի է ընկել նաև պատգամավոր Հայկ Սարգսյանը, ով սկզբում հրում էր լրագրողին, ապա նաև որոշեց խլել վերջինիս միկրոֆոնը:

Ոչ պակաս լկտի պահվածք է ցուցաբերում Երևանի քաղաքապետի ՔՊ-ական թեկնածու Տիգրան Ավինյանը, ով քաղաքական գործչին ոչ վայել ձևով է շփվում քաղաքացիների հետ։

Մարդու իրավունքների պաշտպանության և հանրային հարցերի մշտական հանձնաժողովի արտահերթ նիստում իր պահվածքով աչքի ընկավ պատգամավոր Արթուր Հովհաննիսյանը։

Մալաթիա Սեբաստիայի թաղապետ Արման Բարխուդարյանն էլ օրերս մենամարտի էր բռնվել ԱԺԲ ներկայացուցիչների հետ, ովքեր քննադատել էին Նիկոլ Փաշինյանին: Թաղապետն էլ հավանաբար մտածել է` ավելի լավ է ծեծկռտուքի մեջ ընկնեմ, խայտառակվեմ, քան թե Նիկոլ Փաշինյանն իմանա, որ իրեն չեմ պաշտպանել, ու պաշտոնից ազատի:

«Ժողովուրդ» օրաթերթի տեսախցիկը ֆիքսել էր, թե ինչպես է Կենտրոն վարչական շրջանի ղեկավար Սամվել Ղուկասյանը Աբովյան 22 հասցեի բակ մտել (առաջին տպավորությամբ) թիկնապահների ուղեկցությամբ: Երբ  լրագրողը մոտեցավ թաղապետին՝ պարզելու, թե ինչու է բակ եկել, նա հայտնեց, թե եկել են աշխատանքները ստուգելու։ Այսինքն՝ թաղապետն իր աշխատակիցներով շրջում է բակերում՝ ստուգելու, թե ինչպես են այս կամ այն աշխատանքներն արվել: Իրականում Սամվել Ղուկասյանը, մեղմ ասած, ստեց, քանի որ իր հետ շրջողներից որեւէ մեկը Կենտրոն վարչական շրջանի աշխատակից չէր: Ու հենց իրենք իրենց փողոցային վարքով մատնեցին իրենց ով լինելը: Նախ՝ ագրեսիա ցուցաբերեցին տեսախցիկ տեսնելիս, ապա միայն խաղաղվեցին, երբ իմացան՝ ուղիղ եթեր է: Բոլորը փախան կադրից՝ թաղապետին թողնելով միայնակ:

Անհասկանալի է, թե ինչ նոր քաղաքական մշակույթ էին պատրաստվում սերմանել Հայաստանում ՔՊ-ականները, եթե նախկինների ավանդույթները ոչ միայն շարունակում են, այլ մի բան էլ գերազանցում վերջիններիս...