Մենք ուժից ու համարձակությունից ավելի՝ կարիք ունենք իմաստության․ Արցախի թեմի առաջնորդի շնորհավորական ուղերձը

Արցախի թեմի առաջնորդ Վրթանես եպիսկոպոս Աբրահամյանի  շնորհավորական խոսքը ԱԺ հատուկ նիստում 'ուղղված Արցախի Հանրապետության նորընտիր նախագահին

«Մեծարգո Տիար Շահրամանյան,

Հանուն Արցախի թեմի հոգևոր դասի և հավատավոր մեր ժողովրդի, մեր անկեղծ շնորհավորանքներն ենք բերում Ձեզ՝ Արցախի Հանրապետության նախագահի պատասխանատու պաշտոնում  ընտրվելու կապակցությամբ։ Արցախի համար փորձություններով և տեսանելի խոչընդոտներով լի այս ժամանակաշրջանում  Ձեր վրա են սևեռված բոլոր արցախցիների հայացքները, ովքեր հույսով սպասում են կամավորաբար հանձն առած իրենց նեղությունների ու զրկանքների դրական հանգուցալուծմանը։  Իրապես  ծանր է լուծը, բայց քրիստոնյայի համար ցանկացած լուծ դառնում է քաղցր և տանելի, եթե այն կրում է սիրով ու հանուն սրբազան գաղափարի։ 

Քաջատեղյակ լինելով Ձեր նախընթաց ճանապարհին և Արցախի պետականաշինության գործում ունեցած մեծ ավանդին, համոզված ենք, որ միևնույն նախանձախնդրությամբ պիտի շարունակեք ծառայել մեր ժողովրդին նաև այս նոր պաշտոնում։ Արդեն 32 տարի է, ինչ արցախցիները կանգնած են հայ ժողովրդի գոյության և արժանապատվության պայքարի առաջնագծում  և բազում զրկանքներ ու տառապանքներ են կրել ու դեռ շարունակում են կրել։ Բազմավաստակ մեր ժողովուրդը այսօր ամեն ինչից առավել կարիք ունի սիրո և անկեղծության, և առաջին հերթին՝ իր երկրի ղեկավարի կողմից։ Արցախի քաղաքական դաշտում առկա համերաշխության և միասնականության մթնոլորտը պետք է դառնա մեր պայքարի ամուր  հիմքը և ողջ հայության համախմբման շարժիչ ուժը։

Ուստի այսօր մենք ուժից ու համարձակությունից ավելի՝ կարիք ունենք  իմաստության, որովհետև առանց իմաստության ամեն ինչ կարող է փոխվել չարիքի։ Սուրբ Գիրքը մեզ ուսուցանում է, որ կատարյալ իմաստության սկիզբը Աստծո հանդեպ ունեցած երկյուղն է։ Առ Աստված ամուր հավատքը և մաքուր խիղճը ամուր պարիսպ են յուրաքանչյուր մարդու և ազգի համար։ «Եթե Աստված չշինի տունը, զուր են աշխատում այն շինողները, եթե Տերը չպահպանի քաղաքը, զուր տեղն են հսկում պահապանները » (Սաղմոս 127։1)։ 127 – րդ սաղմոսի այս գեղեցիկ տողերից ներշնչված՝ աղոթում ենք, որ դուք կարողանաք իմաստությամբ և խոհեմությամբ թեթևացնել մեր երկրի հոգսը, ապահովել արցախահայության խաղաղ կյանքը իր աստվածապարգև  հայրենիքում։

Աստված օրհնի Ձեր նոր առաքելությունը»։