Հեղափոխական պաշտոնյաներն օրենքից վե՞ր. կասկածելի գործարքները շարունակվում են

Մինչ մի շարք նախկին պաշտոնյաների դեմ քրեական գործեր են հարուցվում պետական գույքի հետ կապված տարատեսակ մանիպուլյացիաներ կատարելու և պետությանը ֆինանսական վնաս հասցնելու մեղադրանքով, ՔՊ-ական համայնքապետերը, կարծես, մոռացել են, որ օրենքը նաև իրենց վրա է տարածվում: Արդյունքում` ունենք բազմաթիվ դրվագներ, երբ կասկածելի գործարքներ են կայանում պետական գույքի հետ կապված:

Երևանի ավագանու անդամ Վահե Օհանջանյանին պատկանող ընկերությունը կենտրոն վարչական շրջանում ապօրինի շինարարություն է իրականացնում՝ առաջ մղելով սեփական բիզնես շահը:

Դեռ անցյալ տարի դատարանն ապացուցված էր համարել Վանաձորի նախկին քաղաքապետ Սամվել Դարբինյանի պաշտոնավարման տարիներին նրա  կողմից պաշտոնական դիրքի չարաշահումների և կեղծիքներ կատարելու փաստը, ինչի հետևանքով համայնքին պատճառվել էր ավելի  քան 60 մլն. դրամի վնաս: Վանաձորի ժամանակավոր իշխանությունները դատարան էին դիմել՝ վնասի փոխհատուցման պահանջով, բայց հայցը մերժվել էր: Հանրային ընկալումներում  համայնքային իշխանությունների նման պահվածքն ակնհայտ անգործություն է որակվում։ 

Դիլիջանի համայնքապետ Դավիթ Սարգսյանը բավականին ոչ միանշանակ պատմության կիզակետում է հայտնվել: Մամուլը ահազանգում է, որ Սարգսյանը որոշումներ է ընդունել, որով համայնքի հողերը շուկայականից ցածր գներով օտարել է Երեւանի բնակիչների, երբ Դիլիջանի շատ բնակիչներ տուն կառուցելու համար հողամաս չունեն։ Դիլիջանի համայնքապետարանի ինտերնետային կայքը տեղեկացնում է, որ 2022թ․ ապրիլի 18-ին Դ․ Սարգսյանը որոշում է ընդունել քաղաքացի Սուրեն Մանուկյանին աճուրդային կարգով հողամաս օտարելու մասին։ Դիլիջան համայնքի ղեկավարի 2022թ. մարտի 18-ի թիվ 149-Ա որոշմամբ 2022թ. ապրիլի 18-ին աճուրդի է ներկայացվել Դիլիջան համայնքի սեփականությունը հանդիսացող «Բնակավայրերի հողերից» 690.9քմ հողամաս, Դիլիջանի Սարալանջի փողոցի թիվ 40/2 հասցեում բնակելի տան կառուցման նպատակով, 4836300 դրամ մեկնարկային գնով, աճուրդում 4836300 դրամ առավելագույն գնով հաղթել է Երեւանի Կոմիտասի 7/2 շենքի բնակիչ Սուրեն Մանուկյանը, այդ մասին հողամասերն աճուրդային կարգով օտարող հանձնաժողովի կողմից կազմվել է արձանագրություն: 

Մամուլը այսօր գրել էր, որ Լոռու մարզի Գյուլագարակ համայնքի ՔՊ-ական համայնքապետ Խաչիկ Վարդանյանը պաշտոն ստանալուց հետո զբաղված է համայնքային հողերին տիրանալով։ Գյուլագարակում իր ապօրինի կառուցած շինություններն օրինականացնելուց հետո, դրանց զբաղեցրած համայնքային հողերը քրոջ որդու անունով գրանցելուց բացի՝ համայնքապետը զբաղվել է մերձավորի անունով գրանցված հողի կատեգորիայի փոփոխմամբ և հաջողության հասել։ Փաստաթղթավորումից հետո ավելի ցածր գնով ձեռք բերված գույքերը բազմապատիկ թանկ փորձում են իրացնել։

Մասնագիտությամբ բանասեր Արևիկ Գրիգորյանն անդրադարձել է Էջմիածնի քաղաքապետի կողմից թույլ տված ենթադրյալ ապօրինությանը։ Մասնավորապես, նա նշել է, որ «քաղաքապետի թեթև ձեռքով հսկայական հողատարածք վաճառվել է ոմն Գայանե Վարդանյանին, ով հանդիսանում է Անկարայի թուրք բնակչի կինը»։ Վերջինս որդին` Դավիթը, նախորդ շաբաթ, 4 ոստիկանի ուղեկցությամբ էլ եկել ու վնասել է Արևիկ Գրիգորյանի ընտանիքին պատկանող այգին։ Ավելի քան 20 ծառ ու խաղողի ողկույզ է փչացել։ Տեսանյութում կինը ներկայացնում է, որ Դավիթը հայտարարել է, թե ինքը «գնել» է իրավապահներին ու ինչ ուզի` կանի։ Արևիկ Գրիգորյանի խոսքով՝ թաղամասը նաև բարեկարգման խնդիր ունի, բայց իրենք պատրաստ են շարունակել ապրել անգամ այդ պայմաններում, բայց իրենց հողը թուրքին չվաճառվի:

 Գյումրիի Լևոն Մադոյան և Տիգրան Մեծ փողոցների խաչմերուկում գտնվող մայթի վրա Գյումրիի ավագանու ՔՊ-ական անդամներից մեկը՝  Երվանդ Խանամիրյանն, իրականացնում է շինարարական աշխատանքներ՝ չունենալով համապատասխան շին.թույլտվություն: Արդյունքում՝ քաղաքապետարանը ստիպված էր միջամտել և կանխել օրենքի խախտումը:

Երևանի «Իմ քայլը» խմբակցության ավագանու անդամ Վազգեն Դարբինյանի ղեկավարած «Ավա Գրանիտ» ՓԲԸ-ն 160 մլն դրամով գնել է Էջմիածնի կենտրոնական հրապարակի հարևանությամբ գտնվող նախկին «Գարուն» կինոթատրոնի շենքը և ցանկանում է տեղում բազմաֆունկցիոնալ բնակելի համալիր կառուցել: Էջմիածնի քաղաքապետարանի հարևանությամբ գտնվող, մարմարե սալերով, կամարներով ու մեծ ջահերով երկհարկանի շենքի տեղում նախատեսվող շինության էսքիզային նախագծի վերաբերյալ ապրիլի 18-ին հանրային քննարկում էր կազմակերպվել, որը վարում էր համայնքի ղեկավար Դիանա Գասպարյանը: Սակայն, Սբ. Մեսրոպ Մաշտոց փողոցի թիվ 107 շենքի բնակիչները դեմ են նախկին կինոթատրոնի  տեղում բազմահարկ շենք կառուցելու գաղափարին: Պնդում են, որ այդ տարածքում 5-հարկանի շենքեր կան, և բազմահարկ շենքի գոյությունը կարող է լուրջ դժվարություններ առաջացնել բնակիչների համար:

Երեւանի ավագանու «Իմ քայլը» դաշինքի անդամի ղեկավարած ՍՊԸ-ն Կենտրոնում խախտումներով շինարարություն է անում: «ՀԵՏՔ»-ը գրում է, որ  Բագրատ Մանուկյանն ու քույրը՝ Սրբուհի Մանուկյանը, բնակվում են Երևանի Այգեստան 2-րդ փողոց, 18 հասցեում։ «Ման Գրուպ» ընկերությունը, որի տնօրենը Երևանի ավագանու «Իմ քայլը» դաշինքի անդամ Վահե Օհանջանյանն է, նախորդ տարվա նոյեմբեր ամսին շինարարություն է սկսել նույն փողոցում գտնվող Այգեստան 2-րդ փողոց 16 և 16/1 հասցեներում։ Շինարարության հետեւանքով վնասվել է Մանուկյանների տունը, բակի բետոնապատ հատվածում առաջացել են ճաքեր։