Ավստրիայում հայտարարել են ԵՄ-ին Թուրքիայի անդամակցության անհնարինության մասին

Ավստրիայի դաշնային կանցլեր Կարլ Նեհամերը կոչ է արել Եվրամիությանը (ԵՄ) դադարեցնել Թուրքիայի անդամակցության շուրջ բանակցությունները: Նրա խոսքով, Անկարայի լիիրավ անդամակցությունը կազմակերպությանը «անհնար է պատկերացնել»։ Այս մասին Նեհամերը հայտարարել է Die Welt թերթին տված հարցազրույցում։

«Մենք աջակցում ենք Անկարայի և Բրյուսելի հետագա մերձեցմանը, սակայն Թուրքիայի լիիրավ անդամակցությունը ԵՄ-ին անհնար է պատկերացնել։ Կարևոր է ազնիվ լինել միմյանց հետ հարաբերություններում։ Եվ դա ներառում է անդամակցության բանակցությունների պաշտոնապես ավարտը, որոնք երկար տարիներ սառեցված էին, և համագործակցության նոր հայեցակարգի մշակումը», - ասել է Նեհամերը:

Միաժամանակ նա Թուրքիային ճանաչել է որպես Եվրամիության կարեւոր գործընկեր։ Անկարան և Բրյուսելը պետք է ձևակերպեն գործընկերության տարբերակ, որը հիմնված կլինի «փոխադարձ վստահության և տնտեսական ու քաղաքական հարցերում համագործակցության վրա», կարծում է կանցլերը։

Մինչ այս, Թուրքիայի նախագահ Ռեջեփ Թայիփ Էրդողանը հայտարարել էր, որ Արևմուտքը կես դար շարունակ չի պահել իր խոսքը՝ խոչընդոտներ ստեղծելով երկրի՝ ԵՄ-ին անդամակցելու համար։