Jerusalem Post. «Հայկական հիշատակ»

Իսրայելական «Ջերուզալեմ Փոստ» օրաթերթը դեկտեմբերի 24-ին «Հայկական հիշատակ» վերնագրով խմբագրական է հրապարակել Հայոց ցեղասպանության ճանաչման հարցի վերաբերյալ, որտեղ մասնավորապես ասվում է.

«Էրդողանը կոպիտ վարք ունի ոչ միայն Իսրայելի նկատմամբ: Չկա որևէ պատճառ անվիճելի պատմական ճշմարտությամբ չհակազդել նրա մեղադրանքներին: Սկզբի համար ինչո՞ւ վերջ չտանք Թուրքիայի կողմից հայերի նկատմամբ իրականացրած դաժանությունների վերաբերյալ Կնեսետի բանաձևի ընդունման դեմ պայքարելու պարսավելի սովորությանը: Մենք կարող ենք քննարկել (բանաձև ընդունելու համար) 1890 թվականին Թուրքիայի կողմից իրականացված առաջին հայկական կոտորածը (100,000-200,000 զոհ), դրան հաջորդած 1915 թվականի մեգա եղեռնը, երբ միլիոնից ավել քաղաքացիական հայեր արյան բաղնիքում կոտորվեցին կամ արտաքսվեցին Սիրիայի ուղղությամբ, Առաջին աշխարհամարտի ժամանակ Թուրքիայի հարավ-արևելքում մորթված տասնյակ հազարավոր ասորիների խնդիրը, 20-րդ դարի ընթացքում և դրանից հետո շարունակվող էթնիկական զտումները, օդային ռմբակոծությունները և այլ գործողությունները, որոնք անկախության ձգտող և արժանի հազարավոր քրդերի կյանք խլեցին, և վերջապես 1974-ին Հյուսիսային Կիպրոս ներխուժումն ու շարունակվող բռնազավթումը (որը միջազգային հանրությանը չի հուզում)»:

Հիշեցնենք, որ մոտ մեկ ժամից Իսրայելի խորհրդարանի՝ Կնեսետի, Կրթության հարցերի հանձնաժողովում կսկսվի Հայոց Ցեղասպանության ճանաչման հարցի քննարկումը։