ԿԻմ Չեն Ընը Պուտինին Հյուսիսային Կորեա է հրավիրել

Հյուսիսային Կորեայի առաջնորդ Կիմ Չեն Ընը Ռուսաստանի նախագահ Վլադիմիր Պուտինին հրավիրել է Հյուսիսային Կորեա։ Այս մասին գրում է KCNA-ն։

«Բանկետից հետո Կիմ Չեն Ընը սիրով հրավիրել է նախագահ Պուտինին իրեն հարմար ժամանակ այցելել ԿԺԴՀ»,- հայտնում է գործակալությունը։

KCNA-ն պնդում է, որ Պուտինն ընդունել է հրավերը։

Սեպտեմբերի 13-ին ՌԴ նախագահի մամուլի քարտուղար Դմիտրի Պեսկովը հայտարարել է, որ Պուտինի պատասխան այցը ԿԺԴՀ դեռ նախատեսված չէ։ «Օրակարգում նման հարց չկա»,- պարզաբանել է նա։ Պեսկովը հավելել է, որ Փհենյանի և Մոսկվայի միջև շփումները նախատեսվում են «արտգործնախարարների միջոցով»՝ հոկտեմբերին։

Ինչպես հայտնի է, Կիմ Չեն Ընը Ռուսաստան է ժամանել սեպտեմբերի 12-ին՝ ՌԴ նախագահի հրավերով։ Սեպտեմբերի 13-ին Պուտինը և Կիմ Չեն Ընը հանդիպեցին «Վոստոչնի» տիեզերակայանում։ Սկզբում առաջնորդները բանակցություններ են վարել ընդլայնված կազմով, ապա հանդիպումը շարունակել տետ-ա-տետ ձևաչափով։ Մեկնաբանելով բանակցությունները՝ Պուտինն ասել է, որ «տեղի է ունեցել կարծիքների շատ անկեղծ փոխանակում տարածաշրջանում տիրող իրավիճակի, երկկողմ հարաբերությունների վերաբերյալ»։