Չեմ կարող հաստատել, որ Ադրբեջանը զգուշացրել է ՌԴ-ին ԼՂ-ում ռազմական գործողություններ սկսելու մասին․ Պեսկով

ՌԴ նախագահի մամուլի քարտուղար Դմիտրի Պեսկովը մեկնաբանել է Ադրբեջանի հաղորդագրությունները, թե Ռուսաստանի իշխանությունները «նախապես տեղեկացված են եղել Լեռնային Ղարաբաղում ռազմական գործողության մեկնարկի մասին», գրում է «Մոսկովսկի կոմսոմոլեցը»։

«Չեմ կարող հաստատել, որ մեզ նախապես ծանուցել են»,- ասել է նա։

Պեսկովը նշել է, որ ռուսական կողմի ջանքերով նախօրեին ապաշրջափակվել է Լաչինի միջանցքը, սակայն հետո սկսվել են ռազմական գործողությունները, և ապրանքների մատակարարումը դադարեցվել է։

Ռուսաստանը կարծում է, որ Լեռնային Ղարաբաղում իրավիճակի վատթարացման պայմաններում հիմնական խնդիրը մարդկանց անվտանգության ապահովումն է, նշել է Պեսկովը։ «Ադրբեջանի զինված ուժերի կողմից իրականացվող ռազմական գործողության ֆոնին մեզ համար առաջինը Ղարաբաղի խաղաղ բնակչության անվտանգությունն ապահովելն է։ Խոսքն, իհարկե, հայ բնակչության մասին է։ Դրա համար պետք է ձեռնարկվեն բոլոր անհրաժեշտ միջոցները»,- ընդգծել է նա։