Նիկոլ Փաշինյանի իշխանությունը ամեն րոպե թուլանում է. CNBC

Նիկոլ Փաշինյանի իշխանությունը Լեռնային Ղարաբաղում ճգնաժամի պատճառով՝ ամեն րոպե  թուլանում է՝ հատկապես այն պարագայում, որ ՀՀ վարչապետը չունի ո՛չ ներքին, ո՛չ արտաքին աջակցություն, գրում է CNBC-ն։

«Շատ երկար ժամանակ սա պատերազմ էր, որն անտեսվում էր շատերի կողմից։ Վերջին մի քանի տարիների ընթացքում այս ու այն կողմում բռնկումներ են եղել, ընդ որում, վերջին բռնկումն ամենաակնհայտ ազդանշանն է այն մասին, որ պատերազմի վերադառնալու հնարավորությունները մեծ են, եթե պատշաճ խաղաղ բանակցություններ չանցկացվեն», ինչպես գրում է պարբերականը, այս մասին ասել է Eurasia Group քաղաքական ռիսկերի խորհրդատվական կազմակերպության եվրասիական քաղաքական ռիսկերի վերլուծաբան Թինաթին Ջափարիձեն:

Տասնամյակներ շարունակ Հայաստանը հենվել է Ռուսաստանի վրա՝ որպես անվտանգության երաշխավոր։ Սակայն, իշխանություններն ավելի ու ավելի են հիասթափվում նրանից, ինչ նրանք համարում են Կրեմլի՝ երկրին աջակցելու ցանկության բացակայություն:

«Շատ հետաքրքիր կլինի տեսնել, թե ինչ է տեղի ունենում Հայաստանի ներսում, քաղաքական առումով, Փաշինյանի ղեկավարության հետ, և արդյոք նա վերապրում է դա, թե ոչ։ Եվ հետո մյուս բանը, որին ես կհետևեի, այն է, թե Արևմուտքը որքանով կկարողանա միջամտել»,-ասել է վերլուծաբանը:

Անդրադառնալով ԱՄՆ-ի և Եվրամիությանը հասանելի տարբերակներին, Ջափարիձեն ասել է, որ թվում է, թե նրանք շատ բան չեն կարող անել՝ բացի անհապաղ դեէսկալացիայի կոչերից և հրապարակայնորեն ռազմական գործողությունները դատապարտելուց:

«Ադրբեջանի դեմ պատժամիջոցների հեռանկարը պետք է դիտարկել՝ որպես «շատ անհավանական»,-հավելել է Ջափարիձեն։