ՔՊ առանցքային դեմքերը չեն շտապում հրապարակավ կանգնել Փաշինյանի կողքին

2020 թվականի նոյեմբերի 9-ի խայտառակ կապիտուլյացիայից հետո Նիկոլ Փաշինյանի թիմակիցները՝ ՔՊ առանցքային դեմքերից սկսած և պատգամավորների օգնականներով վերջացրած հրապարակային իրենց աջակցությունն էին հայտնում Փաշինյանին` ըստ էության կիսելով նրա հետ պատասխանատվությունը ստեղծված իրավիճակի համար: Այն ժամանակ եզակի էին և նկատվում էին այն կարկառուն ՔՊ-ականները, ովքեր հրապարակավ չկագնենցին Փաշինյանի կողքին: Օրինակ՝ Տիգրան Ավինյանը, որին էլ հետագայում թիմակիցները մեղադրեցին դիստանցիա պահելու և թիմի մեջքից հարվածելու համար: 

Այսօր արդեն, երբ Փաշինյանը գնում է Արցախի վերջնական հանձնամանը, աչքի են ընկնում ոչ թե նրան չաջակցող թիմակիցները, այլ հակառակը՝ աջակիցները, այն պարզ պատճառով, որ նրանց թիվը, մեղմ ասած, սակավ է: 

Այդպիսի պաշտոնյաների թվին կարելի է դասել վարչապետ աշխատակազմի ղեկավար Արայիկ Հարությունյանին:

Պատգամավորներ Արփի Դավոյանը և Արթուր Հովհաննիսյանը նույնպես իրենց աջակցությունն են հայտնել Նիկոլ Փաշինյանին:

Փաշինյանին իր նվիրվածությունը շտապել է ի ցույց դնել նաև Վեդիի՝ զոռբայության համայնքապետ դարձած Գարիկ Սարգսյանը:

Անմասն չի մնացել նաև ԱԺ պաշտպանության հանձնաժողովի նախագահ Անդրանիկ Քոչարյանը, նա ոչ ավել ոչ պակաս սպառնացել է կրակել խաղաղ ցուցարարներ վրա:

Սակայն, փաստենք, որ ՔՊ-ականների մեծ մասը այս օրերին նախընտրում է լռել և սպասել, տեսնելու համար թե ինչպես են զարգանում իրադարձությունները գետնի վրա՝ փողոցում: Բացի այդ, նրանց սպասողական վիճակի մյուս բացատրությունը կարող է լինել օրեր առաջ Երևանի ավագանու ընտրություններում կրած փաստացի պարտությունը, երբ պարզ դարձավ, որ ՔՊ-ն Երևանում ՝ Հայաստանի ամենամեծ քաղաքում ունի 9.5 տոկոս վստահության քվե: Բնական է, որ ՔՊ-ականները ևս գիտակցում են իրենց քաղաքական ուժի լեգիտիմության ճգնաժամը և հասկանում, որ դրանում  թիվ մեկ մեղավորն ու պատասխանատուն հենց թիմի առաջնորդն է: Մյուս կողմից ՔՊ առանցքային դեմքերը շատ լավ են գիտակցում, որ Փաշինյանի դիրքերը խարխուլ են նաև արտաքին ուժերի տեսանկյունից և չի բացառվում, որ Արևմուտքը փորձի փոխարինել Փաշինյանին մեկ այլ ՔՊ-ականով, թիմի առանցքային խաղացողների լռությունը պայմանավորված է նաև այս հանգամանքով:  Լուռ են ՔՊ բոլոր թևերը, այդ թվում՝ սորոսական թեևը, որը 2020 թվականի նոյեմբերի 9-ից հետո հրապարակավ աջակցեց Փաշինյանին: Ըստ այդմ, կարող ենք փաստել, որ Նիկոլ Փաշինյանի առանցքային թիմակիցները չեն շտապում կիսել վերջինիս հետ պատասխանատվությունը ստեղծված ծայրահեղ ծանր իրավիճակի համար...