Ռուբեն Սաֆրաստյանը կարծում է՝ հաջորդ տարի ցեղասպանության ճանաչման գործընթացում կտեսնենք դրական տեղաշարժեր

Այսօր լրագրողների հետ հանդիպմանը «Նովոստի» ակումբում, Հայաստանի ԳԱԱ Արևելագիտության ինստիտուտի տնօրեն Ռուբեն Սաֆրաստյանը կարծիք հայտնեց, որ ընդունած օրինագծով Ֆրանսիան ևս մեկ անգամ ապացուցեց, որ մնում է եվրոպական քաղաքականության կարևոր կենտրոններից մեկը։ Բանախոսը կարևորեց նաև այն հանգամանքը, որ Ֆրանսիան մտնում է նախընտրական շրջան։ Բացի դրանից թուրքագետը կարևորեց նաև այն հանգամանքը, որ Թուրքիան այդպես էլ չկարողացավ ապացուցել, որ եվրոպական արժեքների է դավանում։ Նրա խոսքերով այստեղ, անշուշտ, առկա է հայ–ֆրանսիական հարաբերությունների սերտացումը։

«Ինձ համար կարևոր էր այն, որ Ֆրանսիան ևս մեկ անգամ ցույց տվեց, որ հանդիսանում է Եվրոպական արժեքների ստեղծման և տարածման կենտրոններից մեկը», – նշեց նա։ 

Խոսելով Հայոց ցեղասպանության ճանաչման գործընթացի մասին՝ նա նշեց, որ հաջորդ տարի կտեսնենք դրական տեղաշարժեր այս ուղղությամբ։ Բանախոսը դա պայմանավորում է Եվրոպայում Ֆրանսիայի զբաղեցրած առաջատար դիրքերով։ Ըստ նրա՝ դրան կնպաստի նաև նախադրյալների բացակայությունը, որ Թուրքիան կփոխի իր դիրքորոշումը մերժողական քաղաքականության հարցում։ 

Այնուամենայնիվ, բանախոսը համաձայն է, որ Ցեղասպանության ընդունման, և առհասարակ որևէ որոշման կայացման հարցում, Թուրքիայի վրա արտաքին ճնշումները սովորաբար պրոդուկտիվ չեն լինում։ 

Ինչ վերաբերում է օրենքի վավերացումից հետո Թուրքիայի կողմից սպասվող քայլերին, Ռ. Սաֆրաստյանը կարծում է, որ Թուրքիան ոչինչ չի կարող անել։ Նրա կարծիքով, ինչ քայլեր էլ ձեռնարկի Թուրքիան, այդ քայլերը կուղղվեն իր դեմ, քանի որ վեջինս տնտեսապես կախված է Ֆրանսիայից։