Ուր են և ինչու են լռում Հայաստանի խոշոր գործարարներն ու պաշտոնյաները. մաս 11. Վահան Մարտիրոսյան

ԼՈւՐԵՐ.com-ը շարունակում է անդրադառնալ այն պաշտոնյաներին և գործարարներին, ովքեր երկար տարի զբաղեցրել են պետական կարևորագույն պաշտոններ, հարստություն և բիզնես են դիզել՝ Հայաստանի և Արցախի անունը հոլովելով, իսկ այսօր, երբ Արցախում տեղի է ունենում անթաքույց ցեղասպանություն, լռում են և նախընտրում են մնալ ստվերում:

Հաջորդիվ կանդրադառնանք տրանսպորտի և կապի նախկին նախարար Վահան Մարտիրոսյանին, ով իր երկարատև կարիերայի ընթացքում մշտապես ներկայացել է իբրև պաշտոնյա, ում սիրտը ցավում է Հայաստանի և Արցախի համար: Նրա ղեկավարության տակ էր կառուցվում հյուսիս-հարավ ճանապարհի մեծ հատվածը, նա էր հայտարարում, որ դա ռազմավարական նշանակություն ունի նաև երկրի անվտանգության ապահովման տեսանկյունից: Ասել է թե՝ այն ժամանակ երկիրն ու այդ երկրի անվտանգությունը Մարտիրոսյանին անհանգստացնում էին: Նա ռազմավարական ծրագրերից էր խոսում, բազմիցս ի պաշտոնե եղել է Արցախում և այնտեղ ճառեր հնչեցրել Հայաստան-Արցախ կապերը ամրապնդելու վերաբերյալ, Հայաստանի փորձը և իր ոլորտում առկա բարեփոխումների փորձը Արցախում տեղայնացնելու վերաբերյալ:

Այսինքն, Մարտիրոսյանը այն պաշտոնյան է, ով իշխող ՀՀԿ կուսակցության անդամ է եղել և կիսել է այդ կուսակցության գաղափարախոսությունը, առնվազն համաձայն է եղել այն թեզի հետ, որ առանց Արցախ Հայաստանի անվտանգությունը դրվում է հարվածի տակ, իսկ Արցախն էլ երբեք չի կարող լինել Ադրբեջանի կազմում:

Չնայած այս ամենին, Մարտիրոսյանը այսօր համալրեր է այն նախկին պաշտոնյաների շարքերը, որոնք լռում են և չեն ցանկանում անգամ քաղաքացիական դիրքորոշում հայտնել ընթացիկ գործընթացների վերաբերյալ, առնվազն բարոյական աջակցություն ցուցաբերելով էթնիկ զտումների ենթարկվող և հայրենազրկվող արցախահությանը...