Արցախի վրա հարձակումից 2 օր առաջ Թուրքիայում կայացել է ԵՄ-ի, ԱՄՆ-ի և Ռուսաստանի ներկայացուցիչների գաղտնի հանդիպում

ԱՄՆ-ի, ԵՄ-ի և Ռուսաստանի բարձրաստիճան պաշտոնյաները Ստամբուլում գաղտնի բանակցություններ են վարել Լեռնային Ղարաբաղի հակամարտության վերաբերյալ՝ նախքան տարածաշրջանում Ադրբեջանի ռազմական գործողության մեկնարկը։ Հանդիպումը կայացել է սեպտեմբերի 17-ին։ Այս մասին գրում է Politico-ն՝ հղում անելով աղբյուրներին։

Ինչպես հրապարակմանը հայտնել է բարձրաստիճան դիվանագետը, բանակցողները ցանկանում էին ճնշում գործադրել Բաքվի վրա՝ դադարեցնելու Լեռնային Ղարաբաղի իննամսյա շրջափակումը և միջանցք բացելու Հայաստանից մարդասիրական օգնությամբ շարասյունների համար:

Ըստ աղբյուրի՝ զրույցի հիմնական թեման եղել է այն, թե ինչպես ապահովել բեռնատարների մուտքը տարածաշրջան, ինչպես նաև սննդամթերք և վառելիք հասցնել մոտ 100 հազար բնակչի։

Ըստ Politico-ի՝ հանդիպմանը ԱՄՆ-ն ներկայացրել է Կովկասում բանակցությունների գծով Վաշինգտոնի ավագ խորհրդական Լուի Բոնոն, Եվրամիությունը՝ Տոյվո Կլաարը, իսկ Ռուսաստանը Հայաստանի և Ադրբեջանի հարաբերությունների գծով նախագահի հատուկ բանագնաց Իգոր Խովաևին է ուղարկել։ 

«Ադրբեջանը պնդում է, որ իրավունք ունի գործողություններ ձեռնարկել Արցախում և խոստացել է «վերաինտեգրել» նրանց, ովքեր մնացել են այնտեղ։ Եվրոպական խորհրդի նախագահ Շառլ Միշելը ռազմական գործողությունը որակել է՝ որպես «ավերիչ», մինչդեռ Բլինկենը միացել է Ադրբեջանին «Լեռնային Ղարաբաղում հետագա ռազմական գործողություններից զերծ մնալու և  անարգել հումանիտար հասանելիություն ապահովելու» կոչերին»,-գրում է պարբերականը: