Իսրայելը գաղտնի օգնել է Ադրբեջանին. AP New

Իսրայելը զենքերով գաղտնի օգնել է Ադրբեջանին՝ Լեռնային Ղարաբաղը զավթելու գործում։ Այս մասին հայտնի է դարձել AP News-ին։

«Մեզ համար լուրջ խնդիր է, որ իսրայելական զենքը կրակում է մեր ժողովրդի վրա։ Ես չեմ հասկանում, թե ինչու Իսրայելը չի ​​կարող գոնե որոշակի մտահոգություն հայտնել իրենց հայրենիքից վտարված մարդկանց ճակատագրի վերաբերյալ»,- գործակալությանն ասել է Իսրայելում Հայաստանի դեսպան Արման Հակոբյանը։

Ադրբեջանի ռազմական գործողությունն սկսվելուց առաջ ընդամենը մի քանի շաբաթում ռազմական բեռնատար ինքնաթիռները բազմիցս թռել են Իսրայելի հարավային ավիաբազայի եւ Արցախից ոչ հեռու գտնվող օդանավակայանի միջեւ, վկայում են թռիչքների հսկման տվյալները եւ հայ դիվանագետները։ Այդ թռիչքները տագնապեցրել են պաշտոնյաներին Երեւանում, որոնք երկար ժամանակ զգուշանում էին Իսրայելի եւ Ադրբեջանի միջեւ դաշինքից, ասված է հրապարակման մեջ։

Իսրայելի արտաքին գործերի և պաշտպանության նախարարությունները հրաժարվել են մեկնաբանել Լեռնային Ղարաբաղում իսրայելական զենքի կիրառումը կամ Ադրբեջանի հետ իր ռազմական գործընկերության վերաբերյալ Հայաստանի մտահոգությունները:

Փորձագետների գնահատմամբ՝ Իսրայելն Ադրբեջանին է մատակարարել իր զինանոցի գրեթե 70%-ը 2016-2020 թվականներին՝ Ադրբեջանին առավելություն տալով Հայաստանի նկատմամբ և խթանելով Իսրայելի խոշոր պաշտպանական արդյունաբերությունը:

«Իսրայելական զենքերը շատ կարևոր դեր խաղացին՝ թույլ տալով, որ ադրբեջանական բանակը հասնի իր նպատակներին», - ասում է Ստոկհոլմի Խաղաղության միջազգային հետազոտությունների ինստիտուտի ավագ գիտաշխատող Փիթեր Վեզեմանը, որը զբաղվում է զենքի վաճառքի հարցով։