Թուրքիայի ԱԳՆ-ն կոչ է արել ԱՄՆ-ին դադարեցնել համագործակցությունը Սիրիայում քրդերի հետ

Թուրքիայի արտաքին գործերի նախարար Հաքան Ֆիդանը ԱՄՆ պետքարտուղար Էնթոնի Բլինքենի հետ հեռախոսազրույցի ընթացքում կոչ է արել Վաշինգտոնին դադարեցնել համագործակցությունը Սիրիայում քրդական ուժերի հետ։ Այս մասին ՏԱՍՍ-ին հայտնել է Թուրքիայի արտաքին գործերի նախարարության աղբյուրը։

«Այսօր ԱԳ նախարար Հաքան Ֆիդանը հեռախոսազրույց է ունեցել ԱՄՆ պետքարտուղար Էնթոնի Բլինքենի հետ։ Զրույցի ընթացքում նախարար Ֆիդանը Բլինքենին խիստ կերպով հայտնել է, որ ԱՄՆ–ն, որպես դաշնակից, պետք է դադարեցնի համագործակցությունը Սիրիայի հյուսիսում գտնվող «Ժողովրդական ինքնապաշտպանության ուժեր» ահաբեկչական կազմակերպության հետ»,- ասել է ՏԱՍՍ-ի զրուցակիցը։

Նա ընդգծել է, որ Իրաքում եւ Սիրիայում Թուրքիայի «հակաահաբեկչական» գործողությունները կշարունակվեն։

Աղբյուրը նաև նշել է, որ զրույցի ընթացքում Ֆիդանը և Բլինքենը քննարկել են ամերիկյան կործանիչի կողմից Սիրիայի երկնքում թուրքական անօդաչու թռչող սարքի խոցման հետ կապված միջադեպը։ «Պայմանավորվածություն է ձեռք բերվել, որ դեկոնֆլիկտինգի մեխանիզմն արդյունավետ կաշխատի այնպես, որ չխանգարի ահաբեկչության դեմ մեր պայքարին», - ասել է գործակալության զրուցակիցը։

Մինչ այս հայտնի էր դարձել, որ Թուրքիայի ռազմական գործողությունները Քրդստանի բանվորական կուսակցության դեմ, որին Անկարան համարում է ահաբեկչական կազմակերպություն, կդառնան ավելի ակտիվ և կոշտ։