Իսրայելական բանակը վերահսկողության տակ է վերցրել Գազայի հատվածին սահմանակից բոլոր բնակավայրերը

Իսրայելի պաշտպանության բանակը հայտարարել է, որ Գազայի հատվածի հետ սահմանի մոտ գտնվող բոլոր բնակավայրերը գտնվում են ռազմական վերահսկողության տակ, գրում է The Times of Israel-ը։

Իսրայելի պաշտպանության բանակի խոսնակ Դանիել Հագարիի խոսքով՝ իսրայելական զորքերը վերականգնել են վերահսկողությունը Գազայի հատվածի հետ սահմանի բոլոր քաղաքների նկատմամբ, և քաղաքներից ոչ մեկում մարտեր չեն ընթանում։ Եղել են պաղեստինցի ահաբեկիչների հետ բախումների առանձին դեպքեր, ոչնչացվել է 13 ահաբեկիչ։

Սակայն, ըստ իսրայելական բանակի ներկայացուցչի, այդ տարածքում դեռ կարող են լինել ահաբեկիչներ:

Հագարին նաև ասել է, որ Գազայի հատվածում ոչնչացված սահմանային պատնեշները պահպանվում են տանկերով, մարտական ​​ուղղաթիռներով և անօդաչու սարքերով։ Սահմանամերձ 24 քաղաքներից 15-ի բնակիչները տարհանվել են, մնացածը կտարհանվեն մոտ ժամանակներս։

Ռազմական գործողությունների մեկնարկից ի վեր Իսրայելի ուղղությամբ արձակվել է մոտ 4400 հրթիռ։

Հոկտեմբերի 7-ին ՀԱՄԱՍ-ը մի քանի հազար հրթիռ է արձակել Իսրայելի ուղղությամբ և հայտարարել «Ալ-Աքսա ջրհեղեղ» օպերացիայի մեկնարկի մասին։

Իսրայելն իր հերթին սկսել է «Երկաթե սրեր» գործողությունը ՀԱՄԱՍ-ի դեմ: Իսրայելի վարչապետ Նեթանյահուն հայտարարել է, որ երկիրը գտնվում է պատերազմական վիճակում։