«HOPE-2023»-ին՝ բեմադրված ավերիչ երկրաշարժի ժամանակ, ԱԹՍ-ներով փրկարարական աշխատանքներ են տարվել

Հայաստանում ընթանում է «HOPE-2023» որոնողափրկարարական դաշտային ուսումնավարժանքը, որի գործնական փուլը սկսվեց հոկտեմբերի 10-ին: Հայտնում է ՆԳՆ մամուլի ծառայությունը․

«Պատահական չէ, որ ուսումնավարժանքի թեման երկրաշարժն է:

Ըստ սցենարի՝ վաղ առավոտյան Հայաստանը ցնցվել էր ավերիչ երկրաշարժից։ Երկրաշարժի օջախը Գառնիից 8 կիլոմետր հյուսիս-արևելք էր, ցնցման ալիքը` 8-9 բալ ուժգնությամբ, հիպոկենտրոնը` մակերևույթից 10 կիլոմետր խորության վրա: Առավելապես մեծ ավերածություններ են առաջացրել Կոտայքի մարզում։

ՆԳՆ փրկարար ծառայության ուժերը, Արտակարգ իրավիճակների կառավարման տեղական մարմինը, Երևանի քաղաքապետարանը և Կոտայքի մարզպետարանը սկսում են արձագանքման միջոցառումները։

Նման երկրաշարժերի դեպքում ավերածությունները սովորաբար զգալի են լինում, և ոչ մի երկիր ի վիճակի չէ միայն սեփական ուժերով օգնություն ցույց տալու տուժած բոլոր համայնքներին:

Արտաքին գործերի նախարարության միջոցով մարդասիրական օգնության միջազգային կոչ է ուղարկվում և ակտիվացվում է Բնակչության պաշտպանության եվրոպական մեխանիզմի Արտակարգ իրավիճակների արձագանքման համակարգող կենտրոնը։ 24 ժամվա ընթացքում Բնակչության պաշտպանության եվրոպական թիմը, ինչպես նաև Կիպրոսի, Վրաստանի, Հունաստանի, Ֆրանսիայի, Մոնտենեգրոյի և Հյուսիսային Մակեդոնիայի թիմերը օդային և ցամաքային ճաապարհներով ժամանում են Հայաստան։

Փրկարար ուժերն Արտակարգ իրավիճակների կառավարման տեղական մարմնի հետ միասին ժամանող խմբերին դիմավորում են Բագրատաշենի սահմանային հսկողության անցակետում և «Զվարթնոց» միջազգային օդանավակայանում ու նրանց ուղղորդում Կոտայքի մարզի «Լուսակերտի» գործողությունների կենտրոն։

Քաղաքային որոնողափրկարարական աշխատանքները սկսվում են տեղի ուժերի հետ համագործակցությամբ։

Կոտայքի մարզի Արգել և Արզնի բնակավայրերում վաղ առավոտից մեկնարկում են աղետի գոտում միջազգային թիմերի ծավալման, որոնողափրկարարական միջոցառումների նպատակով հրամանատարաշտաբային հավաքների կազմակերպման աշխատանքները:

Արգել գյուղում՝ գործողությունների ծավալման բազայում, բացի տեղական ուժերից, քաղաքային որոնողափրկարարական 6 խմբեր ծավալում են վրաններ և արտակարգ իրավիճակների կառավարման տեղական մարմինների հետ իրականացնում փրկարարական գործողություններ:

Արզնու ձորում տեղակայված 3 ուսումնական հրապարակներում միաժամանակ մեկնարկում են ակտիվ աշխատանքներ՝ փլատակների կառուցատարրերի քանդման և բացման, կինոլոգիական խմբերի օգնությամբ տուժածների որոնման, ավտոմեքենաներից հիդրավլիկ գործիքների կիրառմամբ տուժածներին արգելափակումից դուրսբերման, առաջին օգնություն ցույց տալու ուղղությամբ:

Որոնողափրկարարական աշխատանքներն ուղեկցվում են անօդաչու թռչող սարքերով անցկացվող հետախուզությամբ, իսկ ծանր վնասվածքներ ստացած տուժածին ձորից դուրս բերելու համար աշխատանքներին է միանում ՊՆ ուղղաթիռը:

Պայմանական երկրաշարժից տուժել են նաև Երևան քաղաքում գտնվող պատմամշակութային հուշարձաններ՝ «Էրեբունի» պատմահնագիտական արգելոց-թանգարանը և Հայոց ցեղասպանության թանգարան-ինստիտուտը։ Փլատակներում մնացած այցելուներին անհրաժեշտ առաջին օգնություն ցույց տալու գործում աջակցում են Հայկական Կարմիր Խաչը և «ԼՈՌԷ» կամավորական կազմակերպությունը: Միաժամանակ փրկարարներն աշխատակիցների օգնությամբ տարհանում են թանգարանային նմուշներ:

Ըստ սցենարի` «Մարի Իզմիրլյանի» անվան մտավոր և ֆիզիկական խանգարումներ ունեցող երեխաների հատուկ դպրոցում երկրաշարժի հետևանքով առաջանում է հրդեհ, երեխաներին և անձնակազմին անվտանգ տարհանելու և հոգեբանական օգնություն ցույց տալու համար տեղում աշխատում են ԵՓՎ ստորաբաժանումների և ՓԾ հոգեբանական աջակցության բաժնի ծառայողները։

Ակտիվ որոնողափրկարարական գործողությունները շարունակվում են նաև ողջ գիշեր՝ Աբովյան և Չարենցավան քաղաքներում տեղակայված կետերում, դրանց մասնակացում են միջազգային և տեղական փրկարարական թիմերը, կինոլոգիական ջոկատները:

Հոկտեմբերի 11-ին տեղի ունեցավ փակման արարողությունը, որի ժամանակ ղեկավար կազմը շնորհավորեց մասնակիցներին ու կազմակերպիչներին` ուսումնավարժանքը բարձր մակարդակով անցկացնելու կապակցությամբ և հանձնեց մասնակցության հավաստագրեր»,- ասվում է հաղորդագրության մեջ։