Լուվրում ռումբի առկայության մասին տեղեկության ֆոնին՝ Ֆրանսիայում «ահաբեկչական հարձակման վտանգի» ռեժիմ է մտցվել

Ֆրանսիայի ամենամեծ թանգարաններից մեկը՝ Լուվրը, շաբաթ օրը փակ է այցելուների համար ռումբի մասին հաղորդագրություններից հետո: Այս մասին հայտնում է BFMTV հեռուստաալիքը։

Թանգարանի այցելուները շտապ տարհանվել են, ոստիկանությունը շրջափակել է այն, կատարվում է հետաքննություն։

Թանգարանի մամուլի ծառայությունից հայտնել են, որ աշխատանքների դադարեցումը պայմանավորված է «թանգարանին ու այցելուներին սպառնացող վտանգի մասին նախազգուշացնող գրավոր հաղորդագրություն ստանալու պատճառով»։

Ֆրանսիայում մտցվել է «ահաբեկչական հարձակման վտանգի» սպառնալիքի մակարդակ, որն առավելագույնն է այն երեքից, որը նախատեսված է գործող Վիգիպիրատ հակաահաբեկչական ծրագրով։

Ֆրանսիայի նախագահ Էմանուել Մակրոնի հրամանով՝ հանրապետության քաղաքների փողոցներում կարգուկանոն պահպանելու համար կտեղակայվի 7 հազար զինվորական, ինչը սովորականից երկու անգամ ավելին է։