Արցախցիներին 40 հազար դրամի հույսով թողած ՔՊ-ականները ճոխ ծախսեր են անում բյուջեի հաշվին

Օրեր առաջ Նիկոլ Փաշինյանի ղեկավարած կառավարությունը անոնսեց, որ բնակվարձի ու կոմունալ վճարների պետական աջակցությունից կօգտվեն նաև այն արցախցիները, որոնք շրջափակման ավելի քան 9 ամիսների ընթացքում Կարմիր խաչի միջազգային կազմակերպության միջոցով տարբեր պատճառներից ելնելով տեղափոխվել են Հայաստան։ Ինչպես պարզվեց՝ խոսքը 40+10 հազար դրամ աջակցության ծրագրի մասին է։ Հասկանալի է, որ արցախցիները ի վիճակի չեն 50 հազար դրամով ոչ բնակարանի վարձի գումար վճարել, քանի որ դրանք սկսում են նվազագույնը 250-300 հազար դրամից՝ անգամ Երևանից դուրս գտնվող հատվածներում, ոչ էլ ի վիճակի են ձմռանն ընդառաջ կոմունալներ վճարել՝ հաշվի առնելով, որ արցախցիների ընտանիքները հիմնականում բազմազավակ են՝ այստեղից բխող բոլոր դժվարություններով հանդերձ:

Բայց, արի ու տես, որ ՀՀ կառավարությունը, որը արցախցիներին թողել է 40 հազար դրամի հույսին, ինքն իրեն ոչնչից չի զրկում: Դիցուք՝ ՀՀ ՊԵԿ-ը, որը ղեկավարում է Ռուստամ Բադասյանը, 1,600,000 դրամի ներկայացուցչական ծառայություններ է ձեռք բերել: 

 ՀՀ շրջակա միջավայրի նախարարության անտառային կոմիտեն՝ 660,000 դրամի գրասենյակային նյութեր։

2023 թվականի հունվարի 1-ից մինչեւ հոկտեմբերի 1-ն ընկած ժամանակահատվածում ԲՏԱ նախարարությունը չրեր ձեռք բերելու համար ծախսել է 443 հազար 300 դրամ։ Նույն ժամանակահատվածում նախարարությունը 782 հազար 400 դրամ ծախսել է կոնյակներ ձեռք բերելու համար։ 2018 թվականից հետո, կարծես, ավանդույթ է դարձել կոնյակներ, չրեր եւ սպասքներ գնելը, ինչպես, օրինակ, դատախազության դեպքում է։

ՀՀ վիճակագրական կոմիտեն որոշել է որ հենց այս իրավիճակում բյուջեից պետք է 210000 դրամ հատկացնի աշխատակիցների վերապատրաստման նպատակով։

Երևանի քաղաքապետարանը 111000000 դրամով անվազույգ է ձեռք բերել և 100 հազար դրամի հուշանվերներ և 3720000 դրամի արտահագուստ է գնել՝ մեկ անձից գնման ընթացակարգով։

Վեդու համայնքապետարանը 2000000 դրամի ուղևորափոխադրման ծառայություններ է ձեռք բերել։

Վահան Քերոբյանի էկոնոմիկայի նախարարությունը 30000000 դրամի գովազդային ծառայություններ է ձեռք բերել։

Ֆինանսների նախարարությունը 400,000.00 դրամի gsm հեռախոսներ է ձեռք բերել, ինչպես նաև 44,000.00 դրամի ավտոմեքենաների գորգեր, 87,600.00 դրամի գորգի կտորներ, 24,000.00 դրամի գրչատուփեր։

Գարեգին Բաղրամյանի ՀԾԿՀ-ն 500,000.00 դրամի ներկայացուցչական ծառայություններ է ձեռք բերել։

Ստացվում է, որ արցախցիներին 40 հազար դրամի հույսով պահողները իրենք բյուջեի գումարները բնավ էլ չեն խնայում: Գորգերի և կոնյակի համար այդ բյուջեում գումար կա, իսկ այս իշխանությունների վարած ապաշնորհ քաղաքականության արդյունքում հայրենիք կորցրած արցախցիներին օգնելու համար՝ ոչ: