Երևանը պատրաստ է Թուրքիայի հետ սահմանների բացմանը, գնդակը թուրքական կողմում է․ ԱԳ փոխնախարար

«Երևանը պատրաստ է Թուրքիայի հետ սահմանների բացմանը, գնդակը գտնվում է թուրքական կողմում»,- այդ մասին լրագրողների հետ զրույցում ասել է փոխարտգործնախարար Վահան Կոստանյանը։

Կոստանյանը նշել է, որ Հայաստանը պատրաստ է օգտագործել բոլոր բանակցային հարթակները Հարավային Կովկասում խաղաղություն և կայունություն հաստատելու համար։ 

Նրա խոսքով՝ պայմանավորվածություններ են ձեռք բերվել նախորդ տարվա հունիսին երկու երկրների հատուկ բանագնացների՝ Ռուբեն Ռուբինյանի և Սերդար Քըլըչի միջև։

«Պայմանավորվածությունը վերահաստատվել է մի քանի անգամ, այդ թվում՝ բարձրագույն մակարդակով, ինչպես նաև երկրաշարժից հետո ԱԳ նախարար Արարտ Միրզոյանի Անկարա կատարած այցի ժամանակ։ Մենք պատրաստ ենք սահմանի բացմանը թե՛ երրորդ երկրների քաղաքացիների համար, թե՛ ընդհանուր առմամաբ։ Այս մասով գնդակը գտնվում է թուրքական կողմում»,– ասել է նա։