Բայդենն այսօր կայցելի Իսրայել

ԱՄՆ նախագահ Ջո Բայդենը հոկտեմբերի 18-ին կայցելի Իսրայել, հայտնել է պետքարտուղար Էնթոնի Բլինկենը, հաղորդում է ABC News-ը։

Նրա խոսքով՝ Բայդենի այցը նպատակ ունի ցույց տալ աջակցություն Իսրայելին։ Սպասվում է, որ ամերիկացի առաջնորդը կհանդիպի Իսրայելի վարչապետ Բենիամին Նեթանյահուի և իսրայելցի այլ պաշտոնյաների հետ։

«Ուղևորության ընթացքում Բայդենը կլսի Իսրայելից, թե ինչպես է նա իրականացնելու իր գործողություններն այնպես, որ նվազագույնի հասցվի քաղաքացիական զոհերի թիվը և երաշխավորի, որ մարդասիրական օգնությունը հասնի Գազայի խաղաղ բնակիչներին այնպես, որպեսզի այն «չհասնի ՀԱՄԱՍ-ին», - ասել է Բլինկենը:

ԱՄՆ նախագահը կշարունակի համակարգել իր գործողությունները իսրայելցի գործընկերների հետ՝ ապահովելու ՀԱՄԱՍ-ից պատանդների ազատ արձակումը, վստահեցրել է պետքարտուղարը։

Բլինկենը նաև նշել է, որ ԱՄՆ-ն և Իսրայելը համաձայնության են եկել մի ծրագրի շուրջ, որը թույլ կտա օգնություն տրամադրել Գազայի խաղաղ բնակիչներին։

«Եթե ՀԱՄԱՍ-ը արգելափակի խաղաղ բնակիչներին մարդասիրական օգնության առաքումը, մենք կաշխատենք, որպեսզի դա չկրկնվի»,- հավելել է նա։

Բացի այդ, պետքարտուղարը հայտնել է, որ Բայդենը կարող է այցելել Եգիպտոս։

Իսրայել այցից հետո Բայդենը կմեկնի Հորդանան, ասել է Սպիտակ տան Ազգային անվտանգության խորհրդի խոսնակ Ջոն Քիրբին, գրում է Associated Press-ը։

Ամմանում ամերիկացի առաջնորդը կհանդիպի Հորդանանի թագավոր Աբդալլահ Երկրորդի, Եգիպտոսի նախագահ Աբդել Ֆաթթահ ալ Սիսիի և Պաղեստինի ինքնավարության նախագահ Մահմուդ Աբասի հետ՝ քննարկելու Գազայում հումանիտար իրավիճակը։