Ովքեր են Հայաստանի ամենահարուստ ավագանու անդամները. թոփ 10-յակ

Անդրադառնալով ՀՀ խոշոր համայնքների և քաղաքների ավագանու անդամների կողմից ներկայացված եկամտի և ունեցվածքի հայտարարագրերին՝ այսօր կառանձնացնենք հետհեղափոխական Հայաստանի ամենահարուստ ավագանու անդամների տասնյակը։

Այսպես, ըստ Իջևանի համայնքապետ Արթուր Ճաղարյանի ներկայացրած հայտարարագրի, նրա եկամտի աղբյուրը համայնքի ղեկավարի պաշտոնում ստացած աշխատավարձն է՝ 4 մլն 483 հազար դրամ (1 տարվա համար)։ Նա հայտարարագրել է 404 հազար դրամ դրամական միջոց։ Ճաղարյանը հայտարարագրել է նաև մեկ բնակելի տուն և հողամաս Տավուշի մարզի Բերքաբեր համայնքում, մեկ բնակարան և երկու հողակտոր էլ Իջևան քաղաքում։ Որևէ շարժական կամ թանկարժեք գույք Ճաղարյանը չի հայտարարագրել։ 

Ճաղարյանի տեղակալ Արգիշտի Ամիրխանյանը հայտարարագրել է բնակարան և հողամասեր, 2021-ին ձեռք բերված անհատական բնակելի տուն, 2019-ին ձեռք բերված FORD մակնիշի ավտոմեքենա,  2021-ին ձեռք բերված GMC մակնիշի ավտոմեքենա, հաշվետու տարվա եկամուտները կազմել են 6,467,651.00 դրամ:

Դիլիջանի համայնքապետի տեղակալ Արման Բազինյանը հայտարարագրել է երկու բնակարան Դիլիջանում,  2015-ին ձեռք բերված HONDA մակնիշի ավտոմեքենա, 500,000.00 կանխիկ դրամ, տարվա ընթացքում ստացված եկամուտը կազմել է 4,686,230.00 դրամ, իսկ ահա ստացված վարկերն ու փոխառությունները՝ 2,370,683.00 դրամ

Դիլիջան համայնքի ավագանու անդամ Արտակ Բոջիկյանը հայտարարագրել է երկու բնակարան, հողամաս և ավտոտնակ,MAZDA և TOYOTA մակնիշի ավտոմեքենաներ, 8,500,000.00 դրամ արժողությամբ թանկարժեք զարդ, կանխիկ գումարը կազմել է 4,900,000.00 ՀՀ դրամ, 4,900,000.00 էլ կազմել է հայտարարատուի անունից, օգտին կամ հաշվին ձեռք բերված, երրորդ անձին պատկանող կանխիկ դրամը, կամ կանխիկ դրամը, որից փաստացի օգուտ է ստանում կամ այն տնօրինում է հայտարարատուն:

Էջմիածնի ավագանու անդամ  Արամայիս Միրզոյանը Մրգաստանում երեք անշարժ գույքի միանձնյա սեփականատեր է։ Նա 2011–2012 թվականներին ձեռք է բերել առանձնատուն և երկու շինություն։ Որպես շարժական գույք հայտարարագրել է 2015 թվականի արտադրության CADILLAC, 2016 թվականին գնել է 25 հզր դոլար արժողությամբ ժամացույց, բանկային հաշվին երեք միլիոն դրամ ունի, կանխիկ՝ 4 մլն դրամ, հորից՝ Աշոտ Միրզոյանից նվիրատվություն է ստացել 21.5 մլն դրամ (մոտ 54 հզր դոլար), Իսկուհի Թալաշյանից՝ 53 հզր դոլար։

Վեդիի ավագանու անդամ Արսեն Միրզոյանը հայտարարագրել է Հայաստանի Հանրապետության օրենսդրության համաձայն նոր կառուցված, ձեռք բերված և անշարժ գույքի կադաստր վարող լիազոր մարմնի կողմից հաշվառված ու գնահատված այն շինությունները, որոնք դեռևս չեն ստացել իրավունքների պետական գրանցում, հողամաս, MERCEDES-BENZ  մակնիշի ավտոմեքենա։ Հաշվետու ժամանակաշրջանի եկամուտները կազմել են 180,000.00 դրամ:

Մեծամորի ավագանու անդամ Աշոտ Բարեղամյանը հայտարարագրել է հողամաս Գետաշեն համայնքում, 2018 թվականին ձեռք բերված TOYOTA մակնիշի ավտոմեքենա, 8,000,000.00 կանխիկ գումար: Հայտարարատուի անունից, օգտին կամ հաշվին ձեռք բերված, երրորդ անձին պատկանող կանխիկ դրամը, կամ կանխիկ դրամը, որից փաստացի օգուտ է ստանում կամ այն տնօրինում է հայտարարատուն, կազմել  է 4,000,000.00 ՀՀ դրամ:

Գյումրու ավագանու անդամ, կողոպուտի համար ձերբակալված Աղասի Մաթևոսյանը  հայտարարագրել է Հայաստանի Հանրապետության օրենսդրության համաձայն նոր կառուցված, ձեռք բերված և անշարժ գույքի կադաստր վարող լիազոր մարմնի կողմից հաշվառված ու գնահատված այն շինությունները, որոնք դեռևս չեն ստացել իրավունքների պետական գրանցում: Բանկային հաշվի մնացորդները կազմել են 22,800,000.00 ՀՀ դրամ, կանխիկ դրամը՝ 1,000,000.00 ՀՀ դրամ, ստացված վարկերն ու փոխառությունները կազմել են 21,141,000.00 ՀՀ դրամ:

Սևան համայնքի ավագանու անդամ Նվեր Սեդրակյանը հայտարարագրել է անհատական բնակելի տուն, բնակարան,հողամաս, հասարակական նշանակության շինություն, 2021-ին ձեռք բերված OPEL մակնիշի ավտոմեքենա, կանխիկ դրամը կազմել է 4,800,000.00 ՀՀ դրամ,9,500.00 ԱՄՆ դոլար, 7,500.00 եվրո, 450,000.00 ռուսական ռուբլի, ստացված վարկերն ու փոխառությունները կազմել են 31,000,000.00 ՀՀ դրամ:

Ջերմուկ համայնքի ղեկավարի տեղակալ Աշոտ Խաչատրյանը հայտարարագրել է բնակարան բազմաբնակարան շենքում, հասարակական նշանակության շինություն,  KIA մակնիշի ավտոմեքենա,  տարվա կտրվածքով եկամուտները կազմել են 16,341,724 հազար դրամ: