Ուր են և ինչու են լռում Հայաստանի խոշոր գործարարներն ու պաշտոնյաները. Ռուբիկ Նավոյան

ԼՈւՐԵՐ.com-ը շարունակում է անդրադառնալ այն պաշտոնյաներին և գործարարներին, ովքեր երկար տարի զբաղեցրել են պետական կարևորագույն պաշտոններ, հարստություն և բիզնես են դիզել՝ Հայաստանի և Արցախի անունը հոլովելով, իսկ այսօր, երբ Արցախում տեղի է ունենում անթաքույց ցեղասպանություն, լռում են և նախընտրում են մնալ ստվերում։

Այսօր կանդրադառնանք Գեղարքունիքի մարզպետի տեղակալ Ռուբիկ Նավոյանին, ով պետական կառավարման համակարգում բնավ էլ նորեկ չէ:  1994-1998թթ. Նավոյանը աշխատել է իբրև ՀՀ տրանսպորտի նախարարության ուղևորափոխադրումների բաժնի պետ: 1998-2002թթ. «Զվարթնոց» օդանավակայանի տրանսպորտի ծառայության տնօրեն: 2002-2012թթ.` ՀՀ տրանսպորտի և կապի նախարարության տրանսպորտային տեսչության պետի տեղակալ: 2012- 2015թթ.` Երևանի քաղաքապետարանի տրանսպորտի վարչության պետի տեղակալ: ՀՀ վարչապետի 04.06.2021թ թիվ 614-Ա որոշմամբ նշանակվել է ՀՀ Գեղարքունիքի մարզպետի տեղակալ:

Նավոյանը մշտապես փորձել է իրեն ոիրքավորել իբրև հայրենասեր և Հայաստանի ու Արցախի ճակատագրով մտահոգ պաշոնյա: Դիցուք՝ մասնակցել էր Արցախյան պատերազմներում զոհված խաչաղբյուրցիների հիշատակին կանգնեցված հուշաքարի բացմանը` հանդես գալով Հիշատակի և ոգեկոչման խոսքերով: Նմանատիպ հուշաքարի բացմանն էլ մասնակցել էր Ծաղկաշենում՝ բոցաշունչ ելույթ ունենալով: «Ծաղկաշենը փոքր համայնք է, սակայն հերոսական, քանի որ Արցախյան վերջին պատերազմում ցուցաբերել  է հայրենասիրության վառ օրինակներ՝ տալով 2 զոհ եւ նույնքան վիրավոր, 23 մասնակից։ Խոնարհվում ենք նրանց առաջ, նրանց ծնողների առաջ, որ նման առյուծ զավակներ են պարգեւել մեր ազգին։ Նրանց սխրանքներն իզուր չեն անցնի, նրանց անունները երբեք չեն մոռացվի»,-ասել էր Ռուբիկ Նավոյանը։

Նավոյանին 2022 թվականի առաջին կիսամյակի ընթացքում հատուկ առաջադրանքների և որակյալ աշխատանքների կատարման համար ՀՀ 2022 թվականի պետական բյուջով հաստատված ՀՀ Գեղարքունիքի մարզպետարանի 4111 «Աշխատողների աշխատավարձեր և հավելավճարներ» տնտեսագիտական դաասակարգման հոդվածով նախատեսված միջոցների հաշվին պարգևատրել են մեկ ամսվա պաշտոնային դրույքաչափով: Գուցե պարգևավճարներից չկտրվելու ցանկությունն է, որ ստիպում է հայրենասիրական ճառերով հանդես եկած փոխմարզպետին լռել մի իրավիճակում, երբ նոր թիմակիցների ապաշնորհ քաղաքականության արդյունքում կորցրել ենք Արցախը և արդեն իր ղեկավարած մարզն է հայտնվել թշնամու թիրախում: Ադրբեջանական կողմը չի էլ թաքցնում, որ այսպես ասած՝ աչք ունի Սոթքի և Վարդենիսի, իհարկե նաև՝ Սևանի վրա: Արդյո՞ք փոխմարզպետ Նավոյանը, ով տասնյակ տարիներ աշխատել է այս երկրի պետական կառավարման համակարգում ստեղծված իրավիճակում, բացի հուշաքարերի մոտ արտասանած գեղեցիկ ճառերից, ոչինչ չունի ասելու..

Շարունակելի...