ԱՄՆ-ում Ուկրաինայի համար նախատեսված գումարը գրեթե սպառվել է

ԱՄՆ նախագահի ազգային անվտանգության հարցերով օգնական Ջեյք Սալիվանը Կոնգրեսին կոչ է արել լրացուցիչ ֆինանսավորում տրամադրել Ուկրաինային, քանի որ գումարը «գրեթե սպառվել է»։ Մեկ օր առաջ Ջո Բայդենը Ուկրաինային և Իսրայելին օգնությունն անվանել է «խելացի ներդրում» և ասել, որ հակամարտություններում այս երկրների հաղթանակն անհրաժեշտ է «Ամերիկայի ազգային անվտանգության համար»։ Ճեպազրույցի սղագրությունը հայտնվել է Սպիտակ տան կայքում։

ԱՄՆ վարչակազմը հարցում է ներկայացրել ԱՄՆ Կոնգրեսին՝ 2024 թվականին ազգային անվտանգության կարիքների համար լրացուցիչ ֆինանսավորում հատկացնելու վերաբերյալ։ Մասնավորապես, ԱՄՆ նախագահ Ջո Բայդենը խնդրել է մոտ 106 մլրդ դոլար հատկացնել Ուկրաինային ու Իսրայելին օգնելու, ինչպես նաև ռազմարդյունաբերական համալիրի հզորացման համար։

Սպիտակ տան կառավարման և բյուջեի գրասենյակի ղեկավար Շալանդա Յանգի խոսքով՝ այս գումարից 61,4 միլիարդ դոլարը նախատեսված է Ուկրաինային, 14,3 միլիարդը՝ Իսրայելին ռազմական աջակցության համար։

Բայդենի ազգային անվտանգության հարցերով խորհրդական Ջեյք Սալիվանն ասել է, որ թեման հրատապ է, քանի որ Ուկրաինային հատկացվող միջոցները «գրեթե սպառվել են»։