Ուր են և ինչու են լռում Հայաստանի խոշոր գործարարներն ու պաշտոնյաները. Անան Ոսկանյան

ԼՈւՐԵՐ.com-ը շարունակում է անդրադառնալ այն պաշտոնյաներին և գործարարներին, ովքեր երկար տարի զբաղեցրել են պետական և ռազմական պաշտոններ, Արցախի և Հայաստանի անունը հոլովելով բիզնես են դիզել, իսկ այսօր, երբ Արցախը գրեթե կորսված է, իսկ Հայաստանը գտնվում է լրջագույն վտանգների առջև, նրանք նախընտրում են լռել, ասես ոչինչ էլ տեղի չի ունեցել:

Այսօր կանդրադառնանք Արթիկի քաղաքապետ Անան Ոսկանյանին, ով նախկինում ՀՀԿ-ական է եղել, հանդիսանում է գեներալ Մանվել Գրիգորյանի սանիկը: Նիկոլ Փաշինյանի իշխանության գալուց անմիջապես հետո՝ 2018թ․ հունիսի 21-ին, Ազգային անվտանգության ծառայությունը խուզարկեց Անան Ոսկանյանի Պեմզաշենի տունը՝ նրա անունը կապելով այն յուրացումների հետ, որոնց հիման վրա կալանավորեցին գեներալ Մանվել Գրիգորյանին: ԱԱԾ-ն երկրապահի Անան Ոսկանյանի գույքն էր զննում՝ գազալցակայանը, թանկարժեք մեքենան, Երևանի բնակարանը և այլ շարժական ու անշարժ գույքեր։ Փաշինյանամերձ լրատվամիջոցներից մեկը նույնիսկ գրել էր, որ Ազգային անվտանգության ծառայությունը Շիրակի մարզի Պեմզաշեն համայնքում խուզարկել է Մանվել Գրիգորյանի սանիկի՝ Անան Ոսկանյանի տունը: «Ըստ տեղեկությունների՝ Անան Ոսկանյանի անունը կապվում է այն յուրացումների հետ, որոնց հիման վրա կալանավորեցին Մանվել Գրիգորյանին»,- գրել էր իշխանամերձ լրատվամիջոցը:

Անան Ոսկանյանը ժամանակին կրծքով պաշտպանում էր Մանվել Գրիգորյանին, օրինակ՝ լրատվամիջոցներից մեկում հրապարակված հոդվածի վերաբերյալ, թե Մանվել Գրիգորյանը 700 հոգանոց խնջույք է կազմակերպել, բայց 300 հոգու համար է հյուրասիրության պատրաստություն տեսել, Անան Ոսկանյանը արձագանքել էր հետևյալ կերպ․ «Որ թերթ են տպում, ուրեմն ինչ ուզեն` կգրե՞ն: Հարյուրհազարավոր հայրենասեր հայ մարդկանց համար Զորավարի ծնունդը ազգային տոն է: Նախ` բոլորին էլ տեղ եղել է, բայց եթե նստելու տեղ չլիներ էլ` դա ոչինչ չէր նշանակում: Մեր եռասերունդ երկրապահական ընտանիքի համար սա տոնական միջոցառում էր, որ հավքվենք, ուրախանանք: Խնջույք լինելուց ավելի, խնջույք լինելուց առաջ սա երկրապահական միջոցառում էր: Միջոցառմանը մասնակցել են Հայաստանի բոլոր տարածքներից, Արցախից, Սփյուռքից երկրապահներ, հայ ազգի նվիրյալներ` անկախ քաղաքական հայացքներից: Ու բոլորն էլ բարձր տրամադրությամբ են մասնակցել, ոչ մեկը կեսից չի լքել հանդիսությունը»:

Ոսկանյանը 2004թ-ից զբաղեցրել է Երկրապահ Կամավորական Միության Արթիկի բաժանմունքի նախագահի պաշտոնը: 2009թ-ից Երկրապահ Կամավորական Միության Վարչության անդամ է, Շիրակի մարզի փոխնախագահ: 2008թ – 2021թթ․ ընտրվել է Պեմզաշեն համայնքի ղեկավար 2021 թվականից ընտրվել է Արթիկ միավորված համայնքի ղեկավար։ 1990թ. ընդգրկվել է «Չաուշ» կամավորական ջոկատի կազմում:  1989-1994թթ. մասնակցել է Հայաստանի Հանրապետության և Լեռնային Ղարաբաղի Հանրապետության ինքնապաշտպանական մարտերին։

Պարգևատրվել է Լեռնային Ղարաբաղի Հանրապետության «Մայրական երախտագիտություն» մեդալով, ՀՀ Երկրապահ կամավորական միության նախագահ «Սպարապետ Վազգեն Սարգսյան» շքանշանով, ԼՂՀ նախագահ «Մարտական ծառայություն» մեդալով:

Այսօր, սակայն, երբ Մանվել Գրիգորյանի ազատագրած և պահած Արցախը սկուտեղով հանձնվել է թշնամուն, իսկ գեներալ Գրիգորյանին այս իշխանությունները ներգրավել էին տուշոնկա-շոուների մեջ, երբ Հայաստանի տարածքներից նորանոր հողեր հանձնելու մասին խոսակցություններ են գնում, Ոսկանյանը լռում է: Չնայած, թվում էր, որ ԼՂՀ ազատագրման համար կռված, գեներալի սանիկ, ԼՂՀ բարձրագույն ղեկավարության կողմից բարձ պարգևների արժանացած պաշտոնյան խոսելու, իր մտահոգությունները կամ առնվազն քաղաքացիական դիրքորոշումը հայտնելու շատ ավելի շատ պատճառներ ուներ, քան նույն, այսպես ասած, քայլած ՔՊ-ականները: Սակայն, ինչպես երևում է, պաշտոնը իսկապես քաղցր բան է և ստիպում է մարդկանց աչք փակել երբեմնի դավանած սկզբունքների և արժեքների վրա:

Շարունակելի....