Իսրայելապաղեստինյան հակամարտության սրումից հետո ՄԱԿ-ի 88 աշխատակից է զոհվել՝ ամենամեծ կորուստը մեկ հակամարտության ընթացքում

ՄԱԿ-ի` Մերձավոր Արևելքում պաղեստինյան փախստականների օգնության և աշխատանքի գործակալության աշխատակիցների թիվը, որոնք սպանվել են իսրայելապաղեստինյան հակամարտության սրումից հետո, հասել է 88-ի, ինչը համաշխարհային կազմակերպության համար նման ամենամեծ ցուցանիշն է: Այս մասին ասվում է Միջգերատեսչական մշտական ​​կոմիտեի ղեկավարների համատեղ հայտարարության մեջ, որը միավորում է ինչպես ՄԱԿ-ի կառուցվածքում, այնպես էլ անկախ գործող հիմնական հումանիտար գործակալությունները։
«Հոկտեմբերի 7-ից ի վեր բազմաթիվ մարդասիրական աշխատողներ են մահացել, այդ թվում՝ ՄԱԿ-ի 88 աշխատակից: Սա ամենամեծ մարդկային կորուստն է, որը ՄԱԿ-ը կրել է մեկ հակամարտության ընթացքում», - նշվում է ՄԱԿ-ի գլխավոր քարտուղարի հումանիտար հարցերով տեղակալ Մարտին Գրիֆիթսի, Պարենի համաշխարհային ծրագրի գործադիր տնօրեն Սինդի Մաքքեյնի, Առողջապահության համաշխարհային կազմակերպության գլխավոր տնօրեն Թեդրոս Ադհանոմ Գեբրեյեսուսի, ՄԱԿ-ի մանկական հիմնադրամի գործադիր տնօրեն Քեթրին Ռասելի և այլոց ստորագրած հայտարարության մեջ:

Նրանք նաև ընդգծել են Գազայի հատվածին բավարար քանակությամբ ջուր, սնունդ, դեղորայք և վառելիք մատակարարելու կարևորությունը և պահանջել են անհապաղ ազատ արձակել բոլոր պատանդներին և պաշտպանել քաղաքացիական ենթակառուցվածքները, ներառյալ հիվանդանոցները, ապաստարանները և դպրոցները:

«Մեզ անհապաղ հումանիտար զինադադար է պետք, անցել է 30 օր, բավական է, սրան պետք է վերջ տալ հիմա»,- ամփոփել են հումանիտար բաժանմունքների ղեկավարները։