Ինչ թանկարժեք արժեթղթեր են ձեռք բերել ՔՊ-ական պաշտոնյաները

Վերլուծական 7 Նոյեմբեր, 2023 20:30

Հեղափոխական պաշտոնյաների մոտ վերջին տարիներին հետաքրքիր տենդենց է նկատվում, նրանցից շատերը ցանկանում են պետական պաշտոնյայի աշխատավարձից զատ այլ եկամտի աղբյուրներն էլ ստեղծել և, կարծես թե, գտել են լուծումը․ միմյանց հերթ չտալով՝ ՔՊ-ականները տարբեր ընկերությունների արժեթղթեր են ձեռք բերում:

Դիցուք՝ Տավուշի մարզպետի տեղակալ Նարեկ Ղուշյանը հայտարարագրել է ԱՁ «Նարեկ Ղուշչյան» ընկերության 100 տոկոս բաժնեմաս: Պարզվում է՝ նա 2016 թվականին Իջևանում որպես նվիրատվություն բնակարան է ստացել: Իսկ նրա եկամուտները կազմել են 33,000.00 ռուսական ռուբլի և 9,972,349.00 դրամ փոխմարզպետի կնոջ՝ Աննա Ալիխանյանի հայտարարագրից տեղեկանում ենք, որ վերջինս Երևանի կենտրոն համայնքում բնակարան է ձեռք բերել, սակայն հայտնի չէ, թե երբ է կատարվել գնումը: Բացի այդ, նա 2018-ին որպես նվիրատվություն է ստացել ավտոմեքենա, 5,843,500.00 դրամի բանկային արժեթուղթ է ձեռք բերել, բացի այդ 22,738.00 դրամի վարկ է վերցրել:

Սյունիքի նախկին մարզպետ Մելիքսեթ Պողոսյանը 2020թ.-ին գնել է պարտատոմս, որի գինը տարեվերջին կազմել է 60 մլն դրամ: Թե կորոնավիրուսի տարածման շրջանում և պատերազմական իրավիճակում ումից է Մ. Պողոսյանը գնել այդ պարտատոմսը և ինչ նպատակով՝ հայտնի չէ: Պողոսյանը հայտարարագրում չի նշել գործարքի մյուս մասնակցի տվյալները: Համապատասխան սյունակում գծիկ է դրել, ինչը համակարգն ընդունել է որպես տվյալ և ընդունել է հայտարարագիրը, մինչդեռ այդ դաշտը պետք է պարտադիր լրացվեր:

ՔՊ-ական պատգամավոր Գուրգեն Արսենյանն ութ ընկերություններում ունի տարբեր չափերի փայեր, բաժնետոմսեր ու բաժնեմասեր։ ՔՊ-ական պատգամավորը, ըստ հայտարարագրի, 2020-ին 8 մլն դոլարով գնել է արժեթուղթ, որի հասցեն Նյու Յորքի Nasdaq-ն է։

ՊՎԾ պետ Ռոմանոս Պետրոսյանը 2018-ին 60 տոկոս բաժնային արժեթուղթ էր հայտարարագրել, թե որ ընկերությունում` հայտնի չէ։

ՔՊ-ական մեկ այլ պատգամավոր Տրդատ Սարգսյանը 2020-ից նա հանդիսանում է կրթական ծառայություններ մատուցող «Պրոմենադ» ՍՊԸ-ի սեփականատերը։

Առողջապահության նախարար Անահիտ Ավանեսյանը 12,000,000.00 դրամի եկամուտ է ստացել «Աբովյան 39» ՍՊԸ-ի իր շահաբաժնից: Այդ ընկերությունը զբաղվում է անշարժ գույքի վարձակալությամբ։ Ըստ Ավանեսյանի՝ Աբովյան 39-ում գտնվող անշարժ գույքը ժառանգություն է ստացել հորից և 2012թ․-ից ի վեր տվել է վարձակալության: «Աբովյան 39»-ի բաժնետերերից են եղել նաև Անահիտ Ավանեսյանի քույրը՝ Շուշան Վարդանյանը, և մայրը՝ Մարգուշ Վարդանյանը: Միևնույն ժամանակ, պետք է նշենք, որ Ավանեսյանի հետ կապվող մեկ այլ՝ «Արմֆարմացիա» ընկերությունը վերջին տարիներին կնքել է 240 պայմանագիր՝ 44 պետական կառույցի հետ, ընդհանուր՝ մոտ 606,7 մլն դրամ արժողությամբ, որի կեսից ավելին՝ 137 պայմանագիրը՝ արդեն Ավանեսյանի՝ փոխնախարար եղած ժամանակ։ «Արմֆարմացիա»-ն տարիներ շարունակ մենաշնորհային դիրք է ունեցել և մատակարարել է «Մեթադոն» հոգեմետ դեղը:

Առողջապահության նախկին նախարար Արսեն Թորոսյանը 2020թ. հունվարին ավստրիական բանկի (Bank Austria)՝ 20,550 Եվրո արժողությամբ պարտատոմս է ձեռք բերել, որի դիմաց տարեվերջին 428 Եվրոյի չափով տոկոս է ստացել (եկամուտ)։

Ըստ 2021 թվականի հայտարարագրի՝ Զարեհ Սինանյանի արժեթղթերը կազմել են 336 հազար դոլար, որոնք նա ձեռք է բերել 2004 թվականին: Գործարքի մյուս կողմը «Նեյշնլ լայֆ գրուպ» ընկերությունն է։ Այն գրանցված է ԱՄՆ-ում և զբաղվում է ապահովագրությամբ։

Պատգամավոր Բաբկեն Թունյանը նույնպես 10 հազար ՀՀ դրամի բաժնեթուղթ է հայտարարագրել, սակայն գործարքի բոլոր մանրամասները գաղտնի են։

ԲՏԱ նախարար Ռոբերտ Խաչատրյանը ունի 500,000 և 50,000 ՀՀ դրամի արժետոմսեր, 4,580,678 ՀՀ դրամ փոխառություն «Սիմարտեկ Ինտեգրեյթիդ Սոլյուշնս» ՓԲԸ-ից և 2,744,000 ՀՀ դրամ՝ «Սիմարտեկ» ՓԲԸ-ից։ Ուշագրավ է, որ վերջինիս կենսագրությունից պարզ է դառնում, որ 2007 - 2016 Խաչատրյանը աշխատել է որպես «Սիմարտեկ» ՓԲԸ (Siemens AG և Schneider-Electric ընկերությունների պաշտոնական գործընկեր ՀՀ-ում, էլ. հոսանքի բաշխման, վերականգնվող էներգետիկայի և արդյունաբերական պրոցեսների ավտոմատացման լուծումների մատակարար) տնօրենի օգնական, փոխտնօրեն, տնօրեն։

Ավելորդ է, իհարկե, նշել, որ այսպիսի կոնֆիգուրացիան ևս բիզնես գործունեության մի տեսակ է և, բնականաբար, իր մեջ կոռուպցիոն ռիսկի նշույլներ է պարունակում: Մինչդեռ պատկան մարմինները կամ չեն նկատում, կամ չեն ցանկանում նկատել այդ նշույլները և անգամ չեն էլ ուսումնասիրում, թե արդյոք այս կամ այն պաշտոնյան չի օգտագործում ի պաշտոնե իր ձեռքի տակ եղած իշխանական լծակները յուր բիզնես եկամուտները խթանելու նպատակով...