Երևանի քաղաքապետը հյուրընկալել է արվեստի և մշակույթի գործիչներին

Ամանորի և Սուրբ ծննդյան տոների կապակցությամբ Երևանի քաղաքապետ Տարոն Մարգարյանը հյուրընկալել է մայրաքաղաքի արվեստի, մշակույթի և սպորտի բնագավառի ներկայացուցիչներին։

Շնորհավորելով առաջիկա տոների կապակցությամբ՝ քաղաքապետն ընդգծել է մշակույթի գործիչների դերը ոչ միայն ոլորտի ավանդույթների պահպանման, այլև որակյալ մշակութային միջավայր ստեղծելու, ինչպես նաև մատաղ սերնդի դաստիարակության գործում։ Տարոն Մարգարյանը մեկ անգամ ևս հավաստիացրել է, որ քաղաքապետարանը շարունակելու է մշակութային ոլորտին աջակցելու ծրագրերը և ընդառաջելու է լավագույն նախագծերին։

«Ուրախությամբ ողջունում եմ այն փաստը, որ կազմակերպվող փառատոները, ցուցահանդեսներն ու երաժշտական միջոցառումները ոչ միայն միջազգային ասպարեզ են դուրս գալիս` ճանաչում բերելով մեզ, այլև մեր քաղաքում նոր ավանդույթներ են ձևավորում և մշակութային պատմություն կերտում», - նշել է քաղաքապետը։

Հայկական գեղանկարչության ասպարեզում ներդրած մեծ ավանդի, ինչպես նաև ծննդյան 75-ամյա հոբելյանի կապակցությամբ գեղանկարիչ Հրանտ Թադևոսյանը, հայ պարարվեստի բնագավառում ներդրած մեծ ավանդի, ինչպես նաև ծննդյան 70-ամյա հոբելյանի կապակցությամբ «Բարեկամություն» համույթի գեղարվեստական ղեկավար Նորայր Մեհրաբյանը, հայ թատերական արվեստում ներդրած մեծ ավանդի, ինչպես նաև ծննդյան 70-ամյա հոբելյանի կապակցությամբ Հայաստանի Հանրապետության ժողովրդական դերասանուհի Ժենյա Ավետիսյանը Երևանի քաղաքապետի որոշմամբ պարգևատրվել են Երևանի քաղաքապետի ոսկե մեդալով։

Արվեստի և մշակույթի բնագավառի մի շարք ներկայացուցիչներ 2011թ. արդյունավետ գործունեության և ստեղծագործական հաջողությունների համար պարգևատրվել են Երևանի քաղաքապետի շնորհակալագրերով։