Ինչ բաժնեմասեր և շահաբաժիններ են հայտարարագրել ՔՊ-ական պաշտոնյաները

Վերլուծական 10 Նոյեմբեր, 2023 20:51

2018թ. հունիսի 7-ին վարչապետ Նիկոլ Փաշինյանը կառավարության գործունեության համար որպես ուղենշային հայեցակարգային հիմնախնդիր հռչակել էր քաղաքականության և բիզնեսի գործնական տարանջատումը: Ոչ միայն չտարանջատվեց, այլ մի բան էլ իր թափով չի զիջում նախկին իշխանության ներկայացուցիչների բիզնես նկրտումներին: Այս մարդիկ իշխանության են եկել ժողովրդին բարեկեցություն, արդարություն բերելու, «նախկինների» արատավոր բարքերը վերացնելու և նման այլ խոստումներով: Բայց ստացվում է՝ իրականում իշխանությունն իրենց է բերել փող, անձնական և բիզնես հաջողություններ ու... մեծ երջանկություն։

Պատգամավոր Արսեն Թորոսյանի հայտարարագրից պարզ է դառնում, որ վերջինս «Bank Austria»-ում ավելի քան 20 հազար եվրոյի չափով ձեռքբերված արժեթղթեր ունի, իսկ տարվա սկզբին բանկում 32 հազար դոլար ավանդը տարվա վերջին զրոյացել է:

ՊՎԾ պետ Ռոմանոս Պետրոսյանը 2018-ին 60 տոկոս բաժնային արժեթուղթ էր հայտարարագրել, թե որ ընկերությունում` հայտնի չէ։

ՔՊ-ական պատգամավոր Գուրգեն Արսենյանն ութ ընկերություններում ունի տարբեր չափերի փայեր, բաժնետոմսեր ու բաժնեմասեր։ ՔՊ-ական պատգամավորը, ըստ հայտարարագրի, 2020-ին 8 մլն դոլարով գնել է արժեթուղթ, որի հասցեն Նյու Յորքի «Nasdaq»-ն է

Առողջապահության նախարար Անահիտ Ավանեսյանը 12,000,000.00 դրամի եկամուտ է ստացել «Աբովյան 39» ՍՊԸ-ի իր շահաբաժնից: Այդ ընկերությունը զբաղվում է անշարժ գույքի վարձակալությամբ։ Ըստ Ավանեսյանի՝ Աբովյան 39-ում գտնվող անշարժ գույքը ժառանգություն է ստացել հորից և 2012թ․-ից ի վեր տվել է վարձակալության: «Աբովյան 39»-ի բաժնետերերից են եղել նաև Անահիտ Ավանեսյանի քույրը՝ Շուշան Վարդանյանը, և մայրը՝ Մարգուշ Վարդանյանը: Միևնույն ժամանակ, պետք է նշենք, որ Ավանեսյանի հետ կապվող մեկ այլ՝ «Արմֆարմացիա» ընկերությունը վերջին տարիներին կնքել է 240 պայմանագիր՝ 44 պետական կառույցի հետ, ընդհանուր՝ մոտ 606,7 մլն դրամ արժողությամբ, որի կեսից ավելին՝ 137 պայմանագիրը՝ արդեն Ավանեսյանի՝ փոխնախարար եղած ժամանակ։ «Արմֆարմացիա»-ն տարիներ շարունակ մենաշնորհային դիրք է ունեցել և մատակարարել է «Մեթադոն» հոգեմետ դեղը:

ԲՏԱ նախարար Ռոբերտ Խաչատրյանը ունի 500,000 և 50,000 ՀՀ դրամի արժետոմսեր, 4,580,678 ՀՀ դրամ փոխառություն «Սիմարտեկ Ինտեգրեյթիդ Սոլյուշնս» ՓԲԸ-ից և 2,744,000 ՀՀ դրամ՝ «Սիմարտեկ» ՓԲԸ-ից։ Ուշագրավ է, որ վերջինիս կենսագրությունից պարզ է դառնում, որ 2007 - 2016 Խաչատրյանը աշխատել է որպես «Սիմարտեկ» ՓԲԸ (Siemens AG և Schneider-Electric ընկերությունների պաշտոնական գործընկեր ՀՀ-ում, էլ. հոսանքի բաշխման, վերականգնվող էներգետիկայի և արդյունաբերական պրոցեսների ավտոմատացման լուծումների մատակարար) տնօրենի օգնական, փոխտնօրեն, տնօրեն։

Տավուշի մարզպետ Հայկ Ղալումյանը շահաբաժին ունի «Հայէկոնոմբանկ» ԲԲԸ-ում:

ՔՊ-ական պատգամավոր Էդուարդ Աղաջանյանը 50 տոկոս բաժնեմաս ունի «Էքսիփէդ» ՍՊԸ-ում, ՍՊԸ-ի մյուս 50 տոկոս բաժնեմասը պատկանում է Նիկոլ Փաշինյանի եղբորորդուն։ Ընկերությունը զբաղվում է հանրային սննդի կազմակերպման գործունեությամբ։

ՔՊ-ական մեկ այլ պատգամավոր Տրդատ Սարգսյանը 2020-ից հանդիսանում է կրթական ծառայություններ մատուցող «Պրոմենադ» ՍՊԸ-ի սեփականատերը։

Ջերմուկի համայնքապետ Վահագն Արսենյանը բաժնեմասեր ունի «Ջերմուկ Գրուպ» ՓԲԸ-ում, «Ռելոադ» ՍՊԸ-ում, «Ջերմուկ Մայր Գործարան» ՍՊԸ-ում, «Բալկան ՊԵՏ Քոմփանի» ՍՊԸ-ում:

Վայք համայնքի ղեկավար Մխիթար Մաթևոսյանի ընտանիքին է պատկանում «Մավշին» ՍՊԸ-ն: Մաթևոսյանն ընդհանուր 537 միլիոն դրամի պայմանագրեր է կնքել իր կնոջը պատկանող ընկերության հետ, ընդ որում՝ մինչև 2022 թվականն այդ ընկերությունը ղեկավարել է հենց ինքը՝ Մխիթար Մաթևոսյանը, սակայն համայնքի ղեկավար ընտրվելուց հետո ընկերության իր բաժնեմասն ու կառավարումը հանձնել է կնոջը՝ Մերի Մարգարյանին։

Արդարադատության նախարար Գրիգոր Մինասյանը ընթացքում ստացել է ընդհանուր 161․6 մլն դրամ եկամուտ, այդ թվում՝ աշխատավարձեր Արդարադատության նախարարությունից ՝ 13․5 մլն դրամ և 173 հազար դրամ «ԷՅ ԷՄ իրավաբանական» ընկերությունից, այլ եկամուտներ HSBC բանկ Հայաստանից՝ 665 հազար դրամ, վերոնշյալ օտարված գույքից գրեթե 109․5 մլն դրամ, 195 հազար դրամ «Մելլաթ» բանկից՝ քաղաքացիաիրավական պայմանագրերից ստացված եկամուտ, 452 հազար դրամ այլ եկամուտ՝ «Տրիադա Պլյուս» ընկերությունից, վարձակալության տրված գույքերից ստացել է մոտ 10,800 եվրո Մարիա Չեռնիցկայայից, 4,836 եվրո՝ Մուրաթիդիս Չարալամբոսից, 480 հազար դրամ «Թի Ընդ Ջի Գրուպ» ՍՊԸ-ից, 5․5 մլն դրամ՝ «Գրինվուդ», 324 հազար դրամ՝ «Փրոֆ Թաքս», 641 հազար դրամ՝ «Շաբաթ Էյ ԷՄ», 17․4 մլն դրամ՝ «Էյ Էմ Իրավաբանական» ընկերություններից, վերջինից նաև շահաբաժին՝ 6․1 մլն դրամ։