Ուր են և ինչու են լռում Հայաստանի խոշոր գործարարներն ու պաշտոնյաները. Արամ Խաչատրյան

ԼՈւՐԵՐ.com-ը շարունակում է անդրադառնալ այն պաշտոնյաներին և գործարարներին, ովքեր երկար տարի զբաղեցրել են պետական և ռազմական պաշտոններ, Արցախի և Հայաստանի անունը հոլովելով բիզնես են դիզել, իսկ այսօր, երբ Արցախը գրեթե կորսված է, իսկ Հայաստանը գտնվում է լրջագույն վտանգների առջև, նրանք նախընտրում են լռել, ասես ոչինչ էլ տեղի չի ունեցել:

Այսօր կանդրադառնանք Լոռու մարզպետ Արամ Խաչատրյանին: Վերջինս մինչ հեղափոխությունը որևէ կապ ՔՊ հետ չի ունեցել, այն եզակի պաշտոնյաներից է, ով ունի ռազմական կրթություն, ծառայել է բանակում: Ահա նրա կենսագրությունից որոշ ուշագրավ դրվագներ: 1999թ. ավարտել է ՀՀ պաշտպանության նախարարության Վազգեն Սարգսյանի անվան ռազմական ինստիտուտը: 1999-2009թթ. ծառայել է ՀՀ զինված ուժերում: 1999-2001թ.թ. եղել է դասակի հրամանատար, 2001-2004թթ. եղել է վաշտի հրամանատար, 2004-2009թթ.-ին՝ գումարտակի շտաբի պետ, մայոր: 2010-2018թթ. աշխատել է Լոռու մարզի Վահագնաձոր համայնքի հիմնական դպրոցի նախնական զինվորական պատրաստության ուսուցիչ: 2012-2016թթ. եղել է Վանաձորի ավագանու անդամ: 2018թ. եղել է Լոռու մարզպետի տեղակալ: 2018թ. դեկտեմբերի 9-ին ԱԺ պատգամավոր է ընտրվել «Իմ քայլը» կուսակցությունների դաշինքի թիվ 9 ընտրատարածքի տարածքային ընտրական ցուցակով: 2020թ. դեկտեմբերի 17-ի ՀՀ կառավարության թիվ 2064-Ա որոշմամբ նշանակվել է Լոռու մարզպետ:

2020 թվականի պատերազմից հետո մարզպետերանի աշխատակազմը մի հայտարարություն էր տարածել, որում, մասնավորապես, ասվում էր՝  «Միասնական ուժերով պիտի լծվե՛նք Արցախը շենացնելու գործին, բոլոր ջանքերը պիտի գործադրենք՝ հետպատերազմյան իրավիճակում հնարավորինս արագ ու սահուն կերպով անցնելու մեր բնականոն կյանքին, միասին անելու ենք հնարավոր ու անհնարին ամեն ինչ՝ վերքերը արագ բուժելու ու լինելու ավելի՛ լավը, քան առաջ էինք»:

Լոռու մարզպետը նաև այն պաշտոնյան էր, ով Փաշինյանի՝ ՀՀ կադաստրի թուղթ չունենալու մասին սկանդալային հայտարարությունը մեկնաբանելիս նախ հայտարարեց, որ նման բան չի լսել, երկրորդն էլ՝ ըստ նրա՝ իր ղեկավարած մարզը կադաստրի վկայական ունի։

Ի՞նչն է խանգարում ռազմական կրթություն ունեցող, վաշտի հրամանատար մայորին այսօր հայտնել իր քաղաքացիական դիրքորոշումն Արցախի կորստի և Հայաստանի գլխին դամոկլյան սրի պես կախված անվտանգային խնդիրների և մարտահրավերների վերաբերյալ: Չենք ուզում հավատալ, որ վերջինս կաշկանդված է իր պաշտոնով, քանի որ հենց ՔՊ-ում բազմիցս հայտարարել են, որ իրենք ժողովրդավար են և բազմակարծությունը ողջունելի է: Այդ դեպքում ինչու չենք լսում հասցեական գնահատականներ այնպիսի բարձրաստիճան պաշտոնյաների կողմից, ինչպիսիք են ՀՀ մարզպետները, այս դեպքում՝ Արամ Խաչատրյանը, ով ընդամենը երկու տարի առաջ կոչ էր անում շենացնել Արցախը:

Շարունակելի...