Ռուսաստանը ծրագրում է Ուկրաինայում «Մայդան-3» կազմակերպել. Զելենսկի

Ուկրաինայի նախագահ Վոլոդիմիր Զելենսկին հայտարարել է, որ ռուսական հատուկ ծառայությունները ծրագրում են մինչև 2023 թվականի վերջ իրականացնել «Մայդան-3» գործողությունը, որն ուղղված է Ուկրաինայում գործող իշխանության տապալմանը։ Զելենսկին հայտարարել է, որ Ռուսաստանը ծրագրում է իրեն հեռացնել իր պաշտոնից, սակայն կոնկրետ ժամկետներ չի նշել, գրում են միջազգային ԶԼՄ-ները։

Բրիտանական The Sun հրատարակությանը տված հարցազրույցում Զելենսկին ասել է, որ, ըստ ուկրաինական հետախուզության, «Մայդան-3»-ի մանրամասները ենթակա են փոփոխության, և պարտադիր չէ, որ վերջնական նպատակը լինի ֆիզիկական վերացումը։ «Դա ուղղված է նախագահին փոխարինելուն։ Հնարավոր է, որ խոսքը սպանության մասին չէ: Նկատի ունեմ պլանների փոփոխությունը: Բայց նրանք կօգտագործեն իրենց ունեցած բոլոր գործիքները»,- նշել է Ուկրաինայի նախագահը։