«Սուրբ Մեսրոպ Մաշտոց» շքանշան՝ Ջ. Գյուլամիրյանին

ՀՀ կրթության և գիտության նախարարության սփյուռքահայ ուսուցիչների վերապատրաստաման և սփյուռքի հայկական գաղթօջախներին կրթամեթոդական աջակցություն ցուցաբերելու ծրագրերի իրականացումն ապահովելու և սփյուռքում հայապահպանաության գործին մեծ նպաստ բերելու համար Խ. Աբովյանի անվան հայկական մանկավարժական համալսարանի հայոց լեզվի և տարրական ուսուցման մեթոդիկայի ամբիոնի պրոֆեսոր Ջուլիետա Գյուլամիրյանին Մեծի Տանն Կիլիկիո Հայ Կաթողիկե եկեղեցու պատրիարքարանի կողմից շնորհվել է «Սուրբ Մեսրոպ Մաշտոց» շքանշան, որը պատրիարքական բարձրագույն պարգևն է:

Շքանշանը հանձնել է Տ. Ներսես Պետրոս ԺԹ. Կաթողիկոս Պատրիարքը Լիբանանի հայկական վարժարանների հայերենի ուսուցիչների համար կազմակերպված ընդունելության ժամանակ:

Ջուլիետա Գյուլամիրյանը մշտապես մասնակցել է սփյուռքահայ ուսուցիչների վերապատրաստման աշխատանքներին և նրա կազմած տարրական ուսուցման ծրագրերը կիրառվում են հայ կաթողիկե համայնքի 6 դպրոցներում:

Ջ. Գյուլամիրյանը հեղինակ է տարրական դասարանների ավելի քան 30 դասագրքերի, 25 մեթոդական ձեռնարկների, 2 բուհական դասագրքերի, մենագրությունների և ավելի քան 200 գիտական հոդվածների, որոնցից 60-ը հրատարակվել են արտերկրում:

Սիրիահայ ուսուցիչների Ջ.Գյուլամիրյանի համատեղ հեղինակությամբ (Հայոց Առաջնորդարանի աջակցությամբ և ՀՀ ԿԳՆ-ի միջնորդությամբ) տպագրվել են նախակրթարանի և առաջին 6 դասարանների հայոց լեզվի դասագրքեր, որոնք հնարավորություն են տվել ամբողջությամբ վերափոխել ուսումնական գործընթացը սփյուռքի հայկական դպրոցներում: Այս գրքերը տարածում են ստացել նաև Սփյուռքի շատ այլ համայնքներում:

Սփյուռքի կրթական գործում ունեցած մեծ ավանդի համար Ջ. Գյուլամիրյանը 2011թ. պարգևատրվել էր նաև ՀՀ կրթության և գիտության նախարարության «Ոսկե հուշամեդալով»: