ՔՊ-ական պաշտոնյաների աշխատանքի ՕԳԳ-ն. Վահան Քերոբյան

Շարունակելով անդրադառնալ հայ պաշտոնյաների աշխատանքի ընթացքում ի հայտ եկած կիքսերին, բացթողումներին և, անշուշտ, ձեռքբերումներին ու աշխատանքի դրական կողմերին՝ այսօր կանդրադառնանք էկոնոմիկայի նախարար Վահան Քերոբյանին:

Ամիսներ առաջ  ԱԺ-ում քննարկվեցին ՀՀ հաշվեքննիչ պալատի կողմից ՀՀ էկոնոմիկայի նախարարությունում ՀՀ 2021 թվականի պետական բյուջեի վեց ամիսների կատարման հաշվեքննության արդյունքների վերաբերյալ ընթացիկ եզրակացությունները: Կառույցի կողմից, մասնավորապես, ուսումնասիրվել է կորոնավիրուսի տնտեսական հետևանքների չեզոքացման հետևանքով տրամադրված վարկերի տոկոսադրույքների սուբսիդավորման ծրագրի շրջանակներում ներկայացված հաշվետվությունը: Ըստ այդմ, հաշվետվության մեջ առկա է եղել խեղաթյուրում՝ 1.249.486 հազար դրամի չափով:

Դրանից առաջ էլ ՊՎԾ-ն էր խախտումներ հայտնաբերել էկոնոմիկայի նախարարությունում:  Դիցուք՝ Պետական վերահսկողական ծառայությունը ստացել էր տվյալներ ՀՀ տարածքից ավտոմեքենաների խլացուցիչների օգտագործված կատալիտիկ չեզոքացուցիչների (катализатор) թանկարժեք մետաղներ պարունակող կերամիկական թափոնների  արտահանման, ինչպես նաև այդ գործընթացում և թափոնների առուվաճառքի ոլորտում առկա խնդիրների մասին, ինչի կապակցությամբ նախաձեռնվել և իրականացվել էին վերահսկողական գործառույթներ: Կառույցը պարզել էր, որ 2018-2022 թվականների ընթացքում 11 կազմակերպությունների կողմից ՀՀ-ից դեպի երրորդ երկներ արտահանվել է ավելի քան  381 տոննա կերամիկական թափոններ: Նշված ժամանակահատվածում ՀՀ Էկոնոմիկայի նախարարությունը կազմակերպությունների կողմից կերամիկական թափոնների արտահանման լիցենզիաներ ստանալու համար ներկայացված հայտերի փաթեթներում առկա տեղեկությունների արժանահավատությունը չի գնահատել և տրամադրել է արտահանման լիցենզիաներ այն պարագայում, որ նշված թափոնների ձեռքբերման, ինչպես նաև որպես վաճառքի գին նշված արժեքները եղել են շուկայական նվազագույն արժեքներից էական՝ մոտ 10 անգամ պակաս:

2021-ի սկզբին Վահան Քերոբյանը հայտարարել էր, որ եթե երկնիշ աճ չլինի, ապա ինքը հրաժարական կտա։ 2021–ին ունեցանք երկնիշ աճ, բայց առաջին անհրաժեշտության տարբեր սննդամթերքների գների աճի տեսքով։ Երկնիշ տնտեսական աճ չկա, բայց նախարարը խոստման համաձայն հրաժարական չի տալիս, հայտարարելով, որ այն ժամանակ երբ նման խոստում էր տալիս՝ կատակ էր անում:

Բացթողումներից զատ առկա են նաև դրական կողմեր, կամ այսպես ասած՝ ձեռքբերումներ:  Դիցուք՝ փոքր և միջին «խելացի» անասնաշենքերի կառուցման կամ վերակառուցման և դրանց տեխնոլոգիական ապահովման աջակցության ծրագիրը տվել է իր արդյունքը: Բացի այդ, վերջին շրջանում նախարարությունն աջակցել է  տնտեսավարողներին ներգրավել բարձր որակավորում ունեցող մասնագետների, ինչը հանգեցրել է Հայաստանի Հանրապետության տարածքում գործող ընկերությունների արտադրողականության բարձրացմանը։ Կարող ենք փաստել, որ դիվերսիֆիկացվել է նաև ներմուծումը, ինչն էական խթան  է հանդիսանում տնտեսական ակտիվության համար: Նախարարությունը վերջերս կազմակերպել էր նաև «Պետություն-մասնավոր երկխոսություն» խորագիրը կրող բիզնես ֆորում, որին մասնակցել են բավական հեղինակավոր տնտեսագետներ, գործարարներ: Կարող ենք առանձնացնել նաև «JP Morgan» խոշորագույն բանկային և ներդրումային կորպորացիայի ներկայացուցիչների՝ Հայաստան ժամանելը և կառուցողական բանակցությունները ՀՀ տնտեսական ոլորտի ներկայացուցիչների հետ: