Անցնող շաբաթվա ամենակարևոր լուրերի ընտրանին

Ձեր ուշադրությանն ենք ներկայացնում անցնող շաբաթվա ամենակարևոր լուրերի ընտրանին: Եվ այսպես՝

Նոյեմբերի 20

Հրետանային համակարգերի արտադրությամբ զբաղվող հնդկական Bharat Forge ընկերությունը հաստատել է, որ վերջերս ցուցադրված MArG 155 անվավոր ինքնագնաց հաուբիցները նախատեսված են Հայաստանի համար:

Հայաստանը խնդրել է ՀԱՊԿ գործընկերներին օրակարգից հանել Հայաստանին օգնության մասին փաստաթուղթը։ Այդ մասին հայտարարել էր ՀԱՊԿ գլխավոր քարտուղար Իմանգալի Տասմագամբետովը:

Հայաստանի Հանրապետության ազգային ժողովի նախագահի տեղակալ Ռուբեն Ռուբինյանն ընդունել է ԵԱՀԿ ԽՎ աշնանային նստաշրջանի աշխատանքներին մասնակցելու նպատակով Հայաստանում գտնվող Վրաստանի խորհրդարանի եվրոպական ինտեգրման հարցերի հանձնաժողովի նախագահ Մակա Բոճորիշվիլիին:

Նոյեմբերի 21

Երևանում մեկնարկեցին երկօրյա Հայ-գերմանական համագործակցության զարգացման միջկառավարական բանակցությունները, որոնց համանախագահներն են հայկական կողմից ՀՀ էկոնոմիկայի նախարար Վահան Քերոբյանը, իսկ գերմանական կողմից՝ ԳԴՀ տնտեսական զարգացման և համագործակցության նախարարության պետքարտուղար Նիլս Աննենը։

Պաշտոնական այցով Հայաստան է ժամանել Իրաքի Հանրապետության նախագահ Աբդ Ալ-Լատիֆ Ջամալ Ռաշիդին; Նա հանդիպումներ է ունեցել ՀՀ վարչապետ Նիկոլ Փաշինյանի և փոխվարչապետ Մհեր Գրիգորյանի հետ:

Ծեծկռտուք և վիճաբանություն է տեղի ունեցել Երևանի ավագանու նիստում: Նիստն ընդհատվել է այն բանից հետո, երբ «Հանրապետություն» խմբակցության ղեկավար Անի Խաչատրյանի ելույթից հետո վեճ առաջացավ նրա ու «Մայր Հայաստան» խմբակցության անդամների միջև։

Հայաստանի ֆուտբոլի ազգային հավաքականը ավարտեց Եվրո 2024-ի ընտրական մրցաշարը՝ խմբում զբաղեցնելով 4-րդ հորիզոնականը և վերջին խաղում պարտվելով Խորվաթիայի հավաքականին: Այսպիսով, Ալեքսանդր Պետրակովի սաներն այս տարի էլ չհաղթահարեցին որակավորման փուլը:

Նոյեմբերի 22

Հայաստանն Ադրբեջանին առաջարկել է սահմանազատման հանձնաժողովների նիստ անցկացնել երկու երկրների միջև պետական սահմանին: Այդ մասին հայտարարությամբ էր հանդես եկել ՀՀ ԱԳՆ-ն:

Կայացել է փոխվարչապետեր Մհեր Գրիգորյանի և Տիգրան Խաչատրյանի համատեղ հանդիպումը Հայաստանում հավատարմագրված ԵՄ ռեզիդենտ և ոչ ռեզիդենտ դեսպանների, ինչպես նաև ԵՄ պատվիրակության ղեկավար, դեսպան Վասիլիս Մարագոսի հետ: Տիգրան Խաչատրյանը ներկայացրել է ԼՂ-ից բռնի տեղահանված անձանց առաջնային կարիքների հասցեագրման նպատակով Կառավարության կողմից իրականացվող միջոցառումները:

Նոյեմբերի 23

Հայաստանի Հանրապետության Ազգային ժողովի նախագահ Ալեն Սիմոնյանը  հյուրընկալել է Իրաքի Հանրապետության նախագահ Աբդ Ալ-Լատիֆ Ջամալ Ռաշիդի գլխավորած պատվիրակությանը:  ՀՀ ԱԺ նախագահը եւ Իրաքի նախագահը մտքեր են փոխանակել երկու երկրների խորհրդարանների գործունեության նմանությունների, խորհրդարանում փոքրամասնությունների ներկայացվածության, տարածաշրջանում տեւական խաղաղություն հաստատելու շուրջ:

ՀՀ ԱԳ նախարարի տեղակալ Մնացական Սաֆարյանը՝ մեկնաբանելով ռուս պատգամավոր  Կոնստանտին Զատուլինի կողմից հնչեցրած մտահոգությունները, որ առաջիկայում կդրվի Գյումրիից ռուսական բազան հանելու, ինչպես նաև ՀԱՊԿ-ից ու ԵԱՏՄ-ից ՀՀ-ի դուրս գալու հարցը նշել է, որ այս փուլում և այս պահին ռուսական ռազմաբազան Հայաստանից հանելու կամ ՀԱՊԿ-ից Հայաստանի դուրս գալու հարցեր ՀՀ օրակարգում չկան։

Նոյեմբերի 24

Ազգային ժողովում  մեկնարկեցին «Հայաստան» դաշինքի կողմից կազմակեպված «Հայաքվեի» օրինագծի հարցով լսումները:

Վարչապետ Նիկոլ Փաշինյանը մամուլի ասուլիսի ընթացքում հայտարարեց, որ Լեռնային Ղարաբաղից բռնի տեղահանված հայերի վերադարձը Լեռնային Ղարաբաղ քննարկվում է, այդ թվում՝ միջազգային հարթակներում, սակայն այսօրվա դրությամբ այդ վերադարձն իրատեսական չէ։

Հայաստանի և Բելառուսի արտգործնախարարներ Արարատ Միրզոյանն ու Սերգեյ Ալեյնիկը հեռախոսազրույցի ընթացքում քննարկել են Մինսկում կայացած ՀԱՊԿ գագաթնաժողովի արդյունքները։ 

Նոյեմբերի 25

Հայաստանում ԵՄ պատվիրակությունը հայտարարություն է տարածել՝ նշելով, որ նոյեմբերի 27-ից 29-ը Հայաստան կժամանի ԵՄ արտաքին գործողությունների ծառայության և Եվրոպական հանձնաժողովի ներկայացուցիչների պատվիրակությունը։

Էկոնոմիկայի նախարարությունը հայտնել է, որ ՄԱԿ ԶՀԿ Գինու զբոսաշրջության 8–րդ համաշխարհային համաժողովը 2024 թ. կկայանա ՀՀ–ում։