Արգենտինայի նախագահը մտափոխվել է դոլարիզացիայի և պեսոյից հրաժարվելու հարցում

Արգենտինայի նոր նախագահ Խավիեր Միլեյը մտափոխվել է երկիրը դոլարիզացնելու և հօգուտ ամերիկյան արժույթի՝ պեսոյից հրաժարվելու հարցում։ Այս մասին հայտնում է Financial Times (FT) թերթը՝ հղում անելով իր աղբյուրներին։

Հրատարակության զրուցակիցն ասել է, որ Միլեյն ի սկզբանե պլանավորում էր երկրի Կենտրոնական բանկի ղեկավարի պաշտոնում նշանակել տնտեսագետ Էմիլիո Օկամպոյին, որը դոլարիզացիայի կողմնակից է։ Սակայն այժմ նրա ծրագրերը փոխվել են, և նախագահը չի դիտարկում նրա թեկնածությունը։

Ըստ FT-ի զրուցակցի՝ դա խոսում է այն մասին, որ Միլեյը կարող էր փոխել իր դիրքորոշումը որոշ տնտեսական հարցերի շուրջ։ Միևնույն ժամանակ, նախընտրական մրցավազքի ժամանակ քաղաքական գործիչը հայտարարել էր, որ պեսոն «կղանքից քիչ» արժե, և երկրի Կենտրոնական բանկը պետք է «պայթեցվի»։ Նոյեմբերի 24-ին նախագահի մամուլի ծառայությունը հայտնել է, որ նա չի հրաժարվի երկրի Կենտրոնական բանկը փակելու մտքից, գրում է ՏԱՍՍ-ը։