Հայաստանը չի կարող պատշաճ գնահատել ստեղծված հնարավորությունը․ Թուրքիայի պաշտպանության նախարար

Ադրբեջանի, Վրաստանի և Թուրքիայի հարաբերությունները ռազմավարական նշանակություն ունեն:

Report-ի հաղորդմամբ՝ այս մասին նոյեմբերի 27-ին Բաքվում հայտարարել է Թուրքիայի ազգային պաշտպանության նախարար Յաշար Գյուլերը՝ Ադրբեջանի պաշտպանության նախարար, գեներալ-գնդապետ Զաքիր Հասանովի և Վրաստանի պաշտպանության նախարար Ջուանշեր Բուրչուլաձեի հետ եռակողմ հանդիպման ժամանակ։

«Մենք վճռական ենք զարգացնել մեր հարաբերությունները և ձգտել կայունության Կովկասում: Ադրբեջանն «ազատագրել է իր հողերը օկուպացիայից»: Տարածաշրջանի երկրները կարող են ինքնուրույն լուծել իրենց խնդիրները: Միջազգային հանրությանը դա ցույց տալու համար մենք կապ ենք պահպանում Երևանի և Բաքվի միջև», - ասել է թուրք նախարարը։

Նրա խոսքով, «3+2» հարթակը լավ ձևաչափ է խնդիրների խաղաղ լուծման համար. «Հայաստանը չի կարող պատշաճ գնահատել ստեղծված հնարավորությունը»,- ասել է նա։

Յ. Գյուլերը հավելել է, որ իրենք ցանկանում են ընդլայնել Ադրբեջանի մասնակցությունը ՆԱՏՕ-ի զորավարժություններին։