ՄԱՊ-ի Ալիկի «մեծահոգությունը» չգնահատվեց ...

Հակակոռուպցիոն դատարանում դեկտեմբերի 1-ին տեղի ունեցավ ԱԺ նախկին պատգամավոր, «ՄԱՊ–ի Ալիկ» անունով հայտնի Ալեքսան Պետրոսյանի և նրա կնոջ՝ Լուսիկ Պետրոսյանի դեմ Գլխավոր դատախազության ներկայացրած հայցադիմումի քննությունը՝ ապօրինի ծագում ունեցող գույքի բռնագանձման պահանջով։  ՀՀ գլխավոր դատախազությունը պահանջում է ՀՀ ԱԺ նախկին պատգամավոր Ալեքսան Պետրոսյանից բռնագանձել ՄԱՊ ընկերության բաժնետոմսերի 60,9%–ը և 1 մլրդ 298 մլն 273 հազար դրամ։

Սակայն, ուշագրավն այստեղ դա չէ, այլ այն հանգամանքը, որ պետությունն ընդամենն ամիսներ առաջ ՄԱՊ-ի Ալիկի որդուն պատկանող ընկերությանը հարկատուների հաշվին հսկայական գումարներ է տվել: Ինչպես գիտենք՝ սեպտեմբերին Երևանում կայանալիք ռեփեր Սնուփ Դոգի համերգն անորոշ ժամանակով հետաձգվել էր, այդ մասին հայտնել էր համերգի կազմակերպիչ «Դոպինգ Սփեյս» ընկերությունը։  Համերգի անցկացման համար նախատեսված 6 միլիոն դոլարը կառավարությունը «Դոպինգ Սփեյս» ընկերությանը տրամադրել էր որպես դրամաշնորհ։ Ընդ որում, ընկերության հետ պայմանագիրը կնքվել էր օգոստոսի 18-ին՝ կառավարության որոշման ընդունումից 1 շաբաթ անց, իսկ մինչ այդ կառավարության պատվիրած մշակութային միջոցառումների փորձից ենթադրվում էր, որ պիտի օգտվեին մեկ անձից գնման եղանակից։ Իսկ համերգը կազմակերպելու էր, ինչպես նշեցինք, «Դոպինգ Սփեյս» ընկերությունը, որը հիմնադրվել է ընդամենն ամիսներ առաջ 2023թ․ հուլիսի 4-ին։ Ընկերության 51 տոկոս բաժնեմասը պատկանում է Մակար Պետրոսյանին: Վերջինս, հիշեցնենք, Ազգային ժողովի նախկին պատգամավոր Ալեքսան Պետրոսյանի («ՄԱՊ-ի Ալիկ») որդին է։

2018-ին ՄԱՊ-ի Ալիկին ձերբակալեցին, նա մեղադրվում էր առանձնապես խոշոր չափով կաշառք ստանալու և փողերի լվացման մեջ: Ըստ քրեական գործի՝ նա, զբաղեցնելով բնապահպանության նախարարի պաշտոնը, գործարար Սիլվա Համբարձումյանին ուսումնասիրության 10 հատուկ լիցենզիաներ տրամադրելու գործընթացն իրականացնելու, հետագայում ուսումնասիրության ժամկետները երկարացնելու և հանքերի շահագործման թույլտվություն ստանալու հարցը նրա օգտին լուծելուն նպաստելու համար պահանջել և ստացել է առանձնապես խոշոր չափերով՝ 4.2 մլրդ դրամին համարժեք 14 մլն ԱՄՆ դոլար կաշառք: Չնայած դրան՝ Պետրոսյանն ընդամենը 30 միլիոն դրամ գրավով ազատ արձակվեց, պետությանը պատճառված վնասի փոխհատուցման մասին էլ որևէ տեղեկություն մինչ օրս չկա, բայց նախկին պատգամավորն այս ընթացքում հասցրել է մի քանի բարեգործական փոխանցում կատարել Փաշինյանի ընտանեկան՝ «Իմ քայլը» հիմնադրամին: Ինչպես տեսնում ենք՝ Փաշինյանն այդ քայլն այնքան էլ չգնահատեց...