ՀՀ անկախության 20-ամյակի առթիվ պետական մրցանակներ և պարգևներ հանձնվեցին մշակույթի գործիչներին

Հայաստանի Հանրապետության անկախության 20-ամյակի առթիվ ՀՀ մշակույթի նախարար Հասմիկ Պողոսյանը շնորհավորեց և հանդիսավորությամբ պետական մրցանակներ հանձնեց հանրապետության վաստակաշատ մի շարք արվեստագետների: Ինչպես նշեց նախարարը` ներկաներից յուրաքանչյուրի անմնացորդ նվիրումի ու հայրենանվեր գործունեության շնորհիվ է նաև գեղեցկանում մեր հասարակության հոգևոր կյանքը: Նրա հավաստմամբ` հիրավի ժողովրդականություն վայելող արվեստագետներ են արժանացել երկրի Նախագահի պարգևներին:

Նախարարը Հայրենիքին մատուցած ծառայությունների համար երկրորդ աստիճանի մեդալներ հանձնեց ՀՀ ԳԱԱ Մ. Աբեղյանի անվան գրականության ինստիտուտի բաժնի վարիչ, բանասիրական գիտությունների դոկտոր, պոֆեսոր Սերգեյ Սարինյանին, Գ. Սունդուկյանի անվան ազգային ակադեմիական թատրոնի տնօրեն Ստեփան Դավթյանին: <<Մովսես Խորենացի>> մեդալներ հանձնվեցին Ալ. Սպենդիարյանի անվան օպերայի և բալետի ազգային ակադեմիական թատրոնի սիմֆոնիկ նվագախմբի գեղարվեստական ղեկավար և գլխավոր դիրիժոր Կարեն Դուրգարյանին, գրող, թարգմանիչ Արևշատ Ավագյանին, <<Սպեղանի>> կամերային երգչախմբի գեղարվեստական ղեկավար և խմբավար Սարինա Ավթանդիլյանին, արվեստաբան Պողոս Հայթայանին, Հայաստանի <<Բարեկամություն>> պարարվեստի պետական համույթի նկարիչ Ռուբինե Հովհաննիսյանին, խմբավար, մանկավարժ Գենիկ Գասպարյանին, Պատմամշակութային ժառանգության գիտահետազոտական կենտրոնի տնօրենի տեղակալ Կորյուն Ղաֆադարյանին, գրող, հրապարակախոս Մարգո Ղուկասյանին, Գ. Սունդուկյանի անվան ազգային ակադեմիական թատրոնի դերասան Արմեն Մարությանին: Վաստակավորի կոչում ստացան ԵՊՀ թատրոնի արտիստուհի Անահիտ Բաբելյանը, նկարիչ Ռուբեն Ղևոնդյանը: Ազգագրագետ Լևոն Աբրահամյանին հանձնվեղ Մշակույթի վաստակավոր գործչի պատվավոր կոչում:

Նախարար Հասմիկ Պողոսյանը գնահատանքի խոսքեր ասաց և նախարարության բարձրագույն պարգևով` ոսկե մեդալով պարգևատրեց նաև կոմպոզիտոր, Երևանի Կոմիտասի անվան կոնսերվատորիայի պրոֆեսոր Միխայիլ Կոկժաևին և ՀՀ մշակույթի նախարարության աշխատակազմի ժամանակակից արվեստի վարչության պետի տեղակալ Սեյրանուհի Գեղամյանին: